HOUSTON, Merca- Erika Jisela Miranda-Álvarez, di 28 aña, tabata na estado y lo mester a haya yiu na Januari, pero el a sufri un abortus pa cual el a perde su yiu. Awo e ta deteni, acusa di asesinato di otro muhe, cual el a mata pa keda cu su yiu recien naci y keda cu e yiu, como sifuera cu e tabata e mama.
Polis di Houston diamars a haya e curpa sin vida di Carolina Flores di 33 aña, cu a wordo hinca mata den su apartamento den e parti noordoost di e ciudad Texano, despues cu un familiar a bati alarma. Flores, cu algun aña atrás a emigra for di Honduras, algun siman atrás a haya su di tres yiu Shamali, cual no a wordo haya den e apartament ora cu polis a yega. No tabata falta nada di balor.
En un principio a interoga e tata di e mucha, marcos Mariano Thomas Palacios, como sospechoso, pero cu no tabata na Texas. Pronto polisnan a yega na e conclusion di cu e mucha lo por a wordo secuestra pa un muhe cu kier a laga e mucha pasa como su yiu.
Investigacionnan a guia e agentenan te na un apartamento den e parti zuidoost di e ciudad, unda cu nan a observa un pareha cu un baby. Segun e relato policial, nan a bin averigua cu e baby tabata esun cu tabata desapareci. E muhe a wordo deteni, pero no su pareha, cu al parecer no tabata na altura di e abortus y e sucedidonan posterior.