KUWAIT – Autoridadnan Kuwaiti a presenta cargo contra un muhe kende a filma un video caminda cu por a scucha con e tabata burla di un cria kende tabata pidi ayudo prome cu el a cay for di un bentana.
E minister di husticia a bisa diadomingo cu e muhe ta enfrenta dos cargo: filma un individuo sin su consentimento y publica un video di un persona sin su consentimento.
Autoridadnan no a duna na conoce e nombernan ni di e muhe Kuwaiti ni di e cria, di nacionalidad Etiope.
Den e video di 12 seconde, por a mira e trahado domestico colga di un banda di un bentana, cu un mirada di teror riba su cara.
“B’a bira loco,” el a grita e muhe Kuwaiti na e cria.
“Wantami! Wantami!”, e trahado a yora, prome cu el a cay for di varios piso.
E paramediconan a responde na e incidente, cu a sosode dia 30 di Maart den e districto Sabah Al-Salem di e ciudad di Kuwait. E muhe a sufri un brasa kibra y otro lesionnan cu no a menasa su bida, di acuerdo cu un funcionario di e Ministerio di Interior, kende a wordo informa riba e caso.
E Sociedad di Kuwait pa Derechonan Humano a emiti un comunicado riba e mesun dia, condenando e accionnan di e doño di trabao y caracterisando esaki como “inhumano.” E grupo tambe a insisti pa autoridadnan investiga.
Autoridadnan a detene e muhe Kuwaiti e mesun dia, di acuerdo cu e funcionario di Ministerio di Interior.
E muhe a argumenta cu e tabata filmando un cuminda cu e tabata preparando den cushina ora cu su yiu muhe a avis’e cu e cria tabata colgando di un bentana den un otro camber.
E muhe Kuwaiti rapidamente a bay den e camber cu su telefon ainda grabando, el a bisa.
Como respuesta na un pregunta formula pa e fiscalnan riba dicon e no a yuda e muhe ora cu el a pidi ayudo, e muhe a responde cu e empleada tabata demasiado pisa y cu e no kier a core riesgo pa e tambe cay door di e bentana.
E doño di trabao a indica cu e cria tabata cu e famia solamente algun dia. Tambe el a nenga rumornan di presunto abusonan cu nan lo mester a haci cu e empleada, kende kier a scapa of hasta mata su mes.
E muhe Etiope no por a wordo contacta pa haci comentario.
Kuwait, mescos cu hopi pais di Medio Oriente, ta practica “kafala”, un sistema di trabao unda cu trahadonan imigrante ta depende di su empleadonan pa e visadonan y mantene e status legal. Criticonan ta argumenta cu e sistema ta crea un relacion desigual entre e partinan, lagando e trahadonan vulnerabel na abuso.
Fuente: CNN en Español