TENNSESSE, Merca- Un pareha Mericano a bira mayornan di un baby mucha muhe dia 25 di November, ora cu nan yiu Emma Wren a nace. Sin embargo, e baby no ta cualkier baby, ya cu por considera cu tecnicamente e ta hopi mas grandi cu esey. El a pasa mas di 20 aña como embryo gefreeze. Aunke cu e ta parce increibel, e historia ta asina aki.
Dia 14 di October 1992, Emma Wren a wordo criopreserva como embryo y 24 aña despues, specificamente dia 13 di Maart ultimo, el wordo descongela den e laboratorio di National Embryo Donation Center (NEDC) na Knoxville. Despues, e embryon a wordo transferi pa e utero di Tina Gibson (26) y despues di un embaraso exitoso, el a bin na mundo na November ultimo. “Emma ta un dushi milager”, su tata Benjamin a declara orguyoso. “Pami e ta perfecto, pa e tabata gefreeze pa tanto aña”, el a agrega. Ta di destaca cu Emma no ta yiu biologico diTina y Benjamin. Segun e personal di investigacion di e Biblioteca Medico Preston di e Universidad di Tennesse, Emma tin e record historico di nacemento di un embryo cu a keda gefreeze durante tanto tempo. Ademas, e recien naci lo por tin un aña menos cu su mama, ya cu Tina tabata tin 25 aña ora cu Emma a wordo transferi pa su matriz.
Fuente: http://www.fox10phoenix.com