SÃO PAULO, Brazil – E mama a sali na estado pa medio di fertilisacion ‘in vitro’ shete luna despues di e transplante. E donante tabata un muhe di 45 aña, mama di tres yiu, cu a muri di un atake celebral.
Dotkernan Brazilero a anuncia e nacemento di e prome baby mucha muhe, yiu di un muhe cu matriz transplanta di un donante cu a fayece, segun AP. E dies prome intentonan pa logra pa un baby nace di un matriz transplanta di un muhe morto, practica na Republica Checa, Turkia y Merca, no a duna resultado.
Na mundo tin 11 mucha cu a nace di matriznan transplanta, aunke den tur e casonan tabata procedente di donantenan bibo, generalmente di famia of amiga di e mamanan.
Segun e agencia, e mama ta un muhe cu a nace sin matriz como consecuencia di un malesa straño y a sali na estado pa medio di fertilisacion ‘in vitro’ shete luna despues di e transplante. E donante tabata un muhe di 45 aña, mama di tres yiu cu a muri di un atake celebral.
E mama, un psicologo di 32 aña, inicialmente a mustra su preocupacion pa e transplante, e dokter hefe di ekipo di transplante di e Scol di Medicina di e Universidad di São Paulo, Dani Ejzenberg. “Esaki tabata lo mas importante di henter su bida”, e dokter a bisa. “Awo el a bin mustra nos su yiu y e ta hopi feliz”, el a agrega.
E muhe, cu no a wordo identifica, a duna luz na december aña pasa, via cesarea. Dokternan mester a corta un pidi di e matriz pa asina e muhe no mester a tuma remedinan anti- rechaso. Casi un aña despues, tanto mama como yiu ta completamente saludabel.