CANBERRA, Australia- Un hende muha a wordo ranca for di un boto ora cu e tabata dunando un grupo di tiburon chikito. Un tiburon a rank’e y bent’e den awa na e costa Australiano.
Melissa Brunning tabata para na e parti patras di e yate, dunando un grupo di tiburon conoci como “nurse sharks”, ora cu un di nan a morde e dede di Melissa y a tir’e den awa.
Imagennan graba cu celular ta mustra e muhe ta grita ora cu el a cay na awa.
“Tur cos a pasa asina lihe. Tur loke mi tabata por a focus ariba dje tabata e hecho cu mi dede no t’ey mas. El a mord’e y mi a sinti como sifuera e tabata kibrando mi wesonan”, Melissa a bisa.
E atake a tuma luga mientras cu e muhe di 34 aña di Perth tabata di vakantie na Dugong Bay, un luga lehano conoci pa su tiburon y su caimanan di awa salo.
E tipo di tiburonnan aki normalmente ta criaturanan pasivo, pero ta bay den defensa ora nan ta sinti nan mes menasa. Den e caso aki, e djentenan di e tiburon y su cachete fuerte tabata suficiente pa fractura Brunning su weso.
Aunke cu el a wordo hisa bek den boto rapidamente pa su compañenan, na principio Brunning a kere cu el a perde su dede den e atake.
“Ora mi a bin arriba y bisa cu mi a perde mi dede y cu mi no tabata por a ni wak mi dede, door cu mi a kere sigur cu mi a perd’e. Cu si mi wak’e probablemente lo mi bay den shock”.
Su dede a sobrevivi y Brunning a sali relativamente ileso for di e incidente.
El a bisa cu tabata fout di su parti pa duna e tiburonnan di come y a avisa otro nan pa no haci esaki.
“Sea consciente di loke ta rond di bo y no duna e tiburonnan di come”.