Un revelacion divino a haci cu Vilma Trujillo a wordo mara y tira den candela pa e wordo cura. E Nicaragüense di 25 aña a muri diamars despues di un siman di agonia door di e serie di kemaduranan cu el a sufri despues di tabata victima di un supuesto acto di exorcismo.
E ritual a cuminsa dia 15 di Februari, ora cu Trujillo a wordo hiba pa wordo someti na un “oracion pa sanacion”.
Esaki a tuma luga den e Vision Celestial di e Asamblea di Dios den e comunidad El Cortezal. Eynan el a keda mara na man y pia, bou supervision di e pastor di e iglesia protestante. E pastor en cuestion no ta wordo reconoci pa e iglesia como tal.
Pero no tabata hasta seis dia despues, dia 21 di Februari despues di mei anochi, ora cu e acto a tuma luga cu a causa e morto di Trujillo.
Trujillo a wordo tira den e candela, mara na man y pia.
E hoben a sufri kemaduranan grave, di prome y segundo grado na 80% di su curpa y aunke el a wordo traslada pa un hospital di Managua, capital di e pais el a fayece diamars marduga.