SAN FRANCISCO, Merca – Un muhe a muri despues di a bebe un thee herbal venenoso cu el a cumpra den e bario Chines di San Francisco, segun loke autoridadnan di salud publico a informa dialuna. Funcionarionan ta pidiendo na personanan pa deshaci di e thee cumpra for di e compania Sun Wing Wo Trading.
E muhe, di mas of menos 50 aña di edad, tabata ‘criticamente malo’ na Februari ultimo, despues di a tuma un thee traha cu blachi cu el a cumpra for di e empresa menciona, di acuerdo cu e comunicado di prensa emiti pa e Departamento di Salud Publico di San Francisco.
Poco despues di bebe e substancia, el a experimenta ‘debilidad y ritmonan cardiaco anormal cu a menasa su bida,’ un situacion cu a rekeri reanimacion y asistencia medico inmediato. E muhe a keda hospitalisa y a muri diasabra ultimo, autoridadnan di salud a reporta.
Den otro incidente, un homber a bira malo tras di consumi un thee traha cu un mescla di diferente blachi cumpra den e mesun luga di San Francisco. Departamento di Salud Publico a anuncia cu e persona afecta a recupera y a sali for di hospital dia 12 di Maart ultimo.
Sin embargo, funcionarionan medico no a identifica e personanan cu a enferma. Un prueba di laboratorio a haya aconito, un toxico a base di mata, den e muestranan tuma for di pashentnan y for di e thee di e compania comercialisador.
Autoridadnan di salud a retira e productonan consumi pa e afectonan for di shelf den tienda y ta rastrando e fuente di contaminacion.
“Cualkier persona cu a cumpra thee di e luga aki no mester bebe y mester deshaci di dje inmediatamente,” dokter Tomas Aragon, funcionario di salud na San Francisco a indica den un declaracion.
“E venenamento di acolito ta ataca curason y e por ta fatal,” el a insisti.
Aconito ta un mata salvahe tambe conoci como anapelo, Chuan Wu, Cao Wu y fuzi. E raisnan procesa di e mata aki sa wordo uza den medicina tradicional Chines pa trata dolor, golpi y otro condicionnan. Aconito curu, sin embargo, ta extremadamente toxico ora cu e wordo consumi, segun un estudio di e revista Clinico Toxicologo.
Una bes cu e drenta e curpa humano, e sintomanan por presenta den e siguiente minuutnan of un paar di ora despues, dependiendo e cantidad ingeri. E manifestacionnan ta inclui cu e cara ta bira doof of hincamento den cara; latido iregular di curason; dolor den pecho; ritmo cardiaco lento of hopi lihe; nausea y/of sacamento; dolor abdominal y diarea.
No tin ningun remedi cu por contraresta e efectonan di e envenenamento pa aconito, segun e Departamento di Salud Publico.
Fuente: CNN en Español