E muchanan ta entusiasma cu e proyecto Earn Your Future di PwC Aruba pasobra nan ta siña spaar y tambe nan ta siña con pa yuda nan mayornan spaar placa den e gastonan na cas. ‘Awor mi a mira cu ta hopi duro pa bo spaar y cu ta hopi importante pa spaar. Ora bo mama mester di placa of no tin cuminda pa come, esaki por ta duro y p’esey ta importante pa spaar’, asina Alana Pitre a trece dilanti di e cosnan cu el a siña di e lesnan di Earn Your Future. El a siña kico ta e meta financiero di un budget y tambe yen cos mas riba con pa bo spaar placa. Alana a conclui cu ta importante pa bo siña spaar awor ya na grandi esaki ta haci’e hopi mas facil pa bo handle cu bo placa.
Ludwig van der Linden di St Michael School a splica cu e dos dianan di training ta pa siña nan con pa yuda nan mayornan spaar placa of cumpra mas cos cu e placa. Ludwig ta conciente awor con importante ta pa bo siña uza bo placa na un forma mas eficiente. Segun Ludwig ta importante pa spaar pasobra asina por yuda e mayornan door di haci menos gasto. Spaar riba awa y coriente tambe ta un bon forma pa yuda bo mayornan. Ludwig kier haya un bon trabou ora e bira grandi ya e por cumpra cosnan bunita y tambe yuda su scol cu a dun’e e educacion pa e yega leu den bida.
Por ultimo a combersa cu Ruben Moreno y el a splica cu algo nobo cu el a siña ta kico ta un budget y con pa balansa esaki. E informacion aki ta importante pa asina den futuro e lo por maneha su placa bon. Ta importante pa spaar ya bo no ta keda bashi y un conseho pa otro hobennan ta pa spaar y siña con bo ta uza bo placa.
Apesar cu ta dos les so e muchanan ta haya, por mira e resultado di esaki den e entusiasmo cu ta reina bou di e hobennan di 6de klas. E muchanan ta contento y tin hopi discusion interesante ta tuma lugar den e klasnan unda cu e hobennan ta intercambia di idea riba con ta e miho forma pa nan spaar nan placa y ki ora pa uza esaki. E esencia di e programa Earn Your Future di PwC Aruba ta pa siña e muchanan con pa maneha nan placa y con pa spaar. Den esaki e muchanan lo siña cu tin cosnan cu ta necesario y tin cosnan cu no ta necesario y con pa pone nan prioridadnan. Despues cu aña pasa e proyecto Earn Your Future a ricibi un bon acogida y tabata un exito, a tuma e disicion pa haci esaki e aña aki atrobe. PwC Aruba ta busca formanan pa sigui aporta na e comunidad y specialmente na e hubentud di Aruba.