Laurent Simons, un mucha naci na Brussels, Belgica na 2009, a hala atencion di medionan di comunicacion, ya cu e mucha lo drenta universidad. Esaki despues di a termina su scol secundario den 18 luna.
Simons a cuminsa su scol secundario na 2016, na Amsterdam, Hulanda. Y el a caba esaki den un tempo record danki na su IQ di al menos 145, hopi mas halto di e rango di entre 90 y 110, asocia cu inteligencia medio.
Durante e periodo aki, Laurent tabata haya e lesnan laf. “Muchanan den mi klas tabata tarda pa contesta, dus ami tabata contesta na nan luga”, segun e mucha splica.
Simons di ocho aña ta papia Frances, Aleman y Hulandes. Pero e tin dificultad pa relaciona su mes cu muchanan di su edad. Su mayornan a confesa cu nan yiu ta prefera lesa prome cu hung cu otro mucha.
Laurent inicialmente a considera pa bira un ciruhano of un astronaut. Pero awo ta inclina mas pa ingenieria. E mucha a señala cu e gusta wiskunde ya cu e ta “hopi amplio y tin varios taki”.
Sin embargo, su tata Alexander kier solamente un cos pa su yiu prodigo. “Si e dicidi di bira carpinte, pa nos e no ta niun problema. Importante ta pa e ta feliz”, e tata a afirma.