NEW DELHI, India- Al menos 36 mucha muhe di scol Indio di entre 10 y 14 aña di edad a resulta herida y transporta pa un hospital diasabra ultimo. Esaki ta despues di a wordo ataca pa un grupo di adolescente y nan mesun mayornan pa a keha di acoso sexual, segun The New Delhi Times a informa. Dos di nan ta den estado critico.
E studiantenan di un scol publico di e districto di Supaul (Bihar) tabata hungado den un zona deportivo diasabra anochi ora cu’n grupo di hoben a cuminsa duna comentarionan sexual. Un di e mucha muhenan a enfrenta e hobennan, cu na comienso a hala atras. Sin embargo, despues e hobennan y algun di nan mayornan a bin bek cu palo pa golpianan.
Un video subi ariba e portal di noticianan local, The Bihar Post, ta mustra un alumno di e scol yorando despues di e atake. “Nan tabata bati tur e mucha muhenan. Nan a kibra nos paña y a bay cu nos lenso pa tapa cabes”, un di e mucha muhenan interna a sclama.
Polis local a informa di cu dos persona a keda deteni y cuater mas a wordo interoga relaciona cu e sucedido. E magistrado di e distrito, cita pa The Times of India a enfatisa cu e hobennan tabata skirbi mensahenan obsceno dirigi na e mucha muhenan, riba e muraya di e scol. E mucha muhenan a denuncia cu nan tabta wordo acosa frecuentemente.