MOGADISHU, Somalia- Deeqa Dahir Nuur, un mucha muhe Somali di 10 aña, a muri den un hospital di Dhusmareb, ciudad ubica den e estado central di Galmadug, Somalia. Esaki door di sangramento interno, varios dias despues di cu el a wordo someti na un mutilacion genital.
E mucha a wordo hiba dia 14 di juli pa su mama na un muhe cu a practica e mutilacion di clitoris, pero segun parce cu den e operacion el a corta un ader importante cu a provoca un hemoragia ora cu e mucha a yega cas. Dor di esaki el a wordo hiba pa hospital, unda cu el a muri. E noticia a wordo confirma pa e activista Hawa Aden Mohamed di e Centro Educativo Galkayo pa Paz y Desarrollo, segun The Guardian.
Esaki ta e prome morto confirma durante hopi aña, den un pais unda cu generalmente ta nenga di tin complicacionnan door di e procedimento di mutilacion genital.
Segun e cifranan di Fondo di Nacionnan Uni pa e Infancia (Unicef) un 98% di muhenan entre 15 y 49n aña a wordo someti na mutilacion genital na Somalia.
Segun cifranan di Unicef di 2014, 98% di e mucha muhenan na Somalia ta victima di e MGF, incluso a pesar di cu mutilacion genital ta prohibi den nan constitucion di 2012. E cifra aki ta di 91% na Egipto, 98% na Mali, 66% na Liberia, 76% na Burkina Faso, 88% na Sudan.
Practica constitucionalmente ilegal
E activista a señaka cu ta poco probabel cu lo tin husticia den e caso aki. “E muhe cu a realisa e operacion no a wordo aresta, pero incluso si esaki tabata e caso, no tin niun ley cu por dune castigo pa cu esaki”, ya cu e ta un practica cu ta radica den e mitonan tradicional”, el a bisa.
Aden Mohamed a sigui bisa cu “ta dificil duna un calculo di e cantidad di mucha muhenan cu ta muri door di mutilacion genital femenino pa luna of pa dia ya cu nan a hura di warda e secreto, specialmente den e zonanan rural.
Di su banda, Brenday Wynne, di e organisacion internacional Donor Direct Action, a afirma cu “ta realmente importante cu esaki ta un caso confirma, ya cu e esunnan cu ta lobby na fabor di e mutilacion genital femenino tin biaha ta defende sin niun sentido cu no ta dañino”. Cu e caso aki, el a bisa, por wordo comproba cu e practica aki tin “consecuencianan medico y psicologiconan pa bida largo, manera nos a wak, di morto”.
Mutilacion genital femenino ta constitucionalmente na Somalia, sin embargo, e presion di gruponan conservador y religioso ta stroba e parlamentarionan di bin cu leynan pa castiga esunnan cu ta practica e operacionnan aki.