BAMAKO, Mali – Djeneba Diarra, un mucha muhe albino di cinco aña, a wordo secuestra y decapita den e pueblo di Fana, na 125 km noord di e capital di Mali, Bamako, segun Daily Mail.
Segun e corant, e mucha a wordo saca for di su cas diadomingo ultimo pa personanan arma. Na comienso e mama a purba sigui e secuestradonan, pero despues el a bira bek pa proteha su di dos yiu muhe, cu tambe ta un albino.
Polisnan a haya e cadaver di e mucha despues, decapita cerca di un meskita. Autoridadnan ta kere cu e mucha tabata victima di un ritual magico, ya cu na hopi pais di Africa, e comunidad ta kere cu e curpa di e albinonan ta posee podernan magico.
Den paisnan como Malawi, Mozambique of Tanzania, hopi mucha albino ta wordo secuestra y asesina cada aña. Esaki ta wordo cometi door di personanan cu ta uza extremidadnan den e ritualnan di magia pa haya rikesa, exito y bon suerte.