CHIAPAS, Mexico- Un mucha indigena di 11 aña di e etnia Tzetlal a wordo decapita diadomingo ultimo cu’n arma blanco. Esaki a tuma luga den e municipio di San Juan Cancuc, den e estado Mexicano di Chiapas, segun autoridadnan local.
E curpa di e menor a wordo haya dialuna entre e plantacionnan di koffie den e comunidad Chojchow y entrega na su famianan. Ademas, e mucha tabata tin golpinan na varios parti di su curpa, pa cual ta sali for di e punto di bista cu el a wordo golpia prome di a wordo ehecuta.
Ministerio Publico Indigena a cuminsa un investigacion pa haya e responsabelnan di e crimen, cual su motibo no ta conoci.
Chiapas ta un di e estadonan Mexicano mas afecta pa e desplasamento masivo causa door di violencia, problema cu ta afecta mas cu tur e sector Indigena. Dia prome di November mas di 1700 indjan Tzotzil a wordo desplasa forsosamente for di e comunidad Chavajeval, municipio di El Bosque, menasa pa gruponan arma.
Door di esaki, e Centro di Derechonan Human Fray Bartolome de las Casas (Frayba) a alerta riba e intesificacion di e crisis humanitario y di e “lesionnan grave na derechonan humano na e poblacion di Pueblonan Originario ya cu e gobierno di Chiapas no ta haciendo nada”.
E organismo a urgi estado Mexicano pa “investiga di manera imparcial y eficiente”, e motibo di e desplasamento forsa di casi 2 mil persona y a pa “proteha e derechonan di Pueblonan Indigena den situacion di vulnerabilidad”.