GALICIA, Spaña – E menor, cu tabata sinta den su carseat hunto cu su mama, a sobrevivi e accidente contra di un bus. Pero door di e accidente el a golpia su cabes y a resulta cu heridanan fuerte. A pesar di cu el a wordo traslada pa hospital, el a muri despues.
Un mucha di solamente tres aña a muri despues di cu el a golpia su cabes fuertemente contra di un tablet ora cu e auto unda e tabata ta hunto cu mama a hay’e den un accidente di trafico.
E suceso aki un biaha mas ta trece e polemica ariba e uzo di dispositivonan digital den auto, specialmente pa muchanan menor di edad.
E mucha tabata sinta den e auto den su carseat reglamentario cu tabata cumpli cu tur e rekisitonan di siguridad internacional.
E menor a sobrevivi e accidente, pero el a dal su cabes den e tablet cu e ta mirando, cual a provoca heridanan serio, segun autoriddnan a indica.
Despues di e accidente, e mucha a wordo traslada den helicopter medico pa un hospital, aunke despues e ta fayece, segun e centro medico.
E accidente a sosode door di un accidente anterior entre dos bus. A pesar di cu den e accidente aki en particular, no tabata tin herido, e mama a termina ta dal tras di un bus cu a baha su velocidad ora cu el a topa cu e accidente. E mama no a brake y a bay dal den e bus.
E mama di 26 aña a resulta herida y a wordo hiba pa hospital, sin cu e ta den peliger. Segun autoridadnan a splica, e tabata sa cu e mester baha velocidad, pero e no por a haci’e.
Den e autobus tabata tin 14 mucha di scol, y un di nan a resulta herida, pa cual el a wordo hiba pa un hospital.