KATMANDU, Nepal- Un mucha muhe di 3 aña a wordo eligi diahuebs como e Kumari nobo di Nepal. Kumari ta un diosa viviente tradicional venera door di Hindustan y Budistanan den e pais di Himalaya desde 500 aña pasa. E ta sigui su predecesor, cu ta hubila cu su 12 aña ora cu e yega e edad unda cu supuestamente e lo haya su prome menstruacion.
E mucha Trisnha Shakya a wordo hiba entre un grupo di fotografonan y den brasanan di su tata pa e Paleis Ghar di Katmandu. Akinan e lo biba den reclusion pa e proximo nuebe añanan, cu salidanan sporadico pa exterior durante festividadnan religioso.
“Nos tin Trishna Shakya como e diosa nobo. E lo reemplasa Martina Shakya cu a completa e nuebe añanan”, segun e sacerdote Uddhav Karmacharya, un di e miembronan di e comite cu a selecciona e mucha diosa.
Mucha muhenan Kumari (birgen) ta tres- esun di Katmandu, Lalitpur y Bhsktaptr-, mester ta pertenece na e comunidad indigena di Neward y na e famia Shakya. Na momento di nan eleccion, nan tin entre dos y cuater aña.
Tambe nan mester por cumpli cu’n serie di rekisitonan, como por ehempel di tin un cierto carta astrologico of un bos cla.
Segun e tradicion, nan ta e reencarnacion di e diosa Hindu Kali y su mandato ta extende te cu su 12 aña, te ora cu nan cuminsa haya nan menstruacion. Despues di esey nan ta bandona e tempel.
Hopi biaha esaki ta wordo mira como un atraccion turistico. Muchanan dios ta ricibi educacion den e compleho unda cu ta nan ta hiba un bida recluso. Aki tambe nan ta haci nan examennan oficial y por ricibi bishita diario di nan mayornan.
Den caso di Martina, eligi na 2008, e tabata e prome Kumari eligi den e periodo republicano, aunke cu e tradicion di muchanan dios ta hopi liga na e ya extinto monarkia Nepali.
“Martina ta liber awo y e por bay studia unda cu e kier. E por casa tambe si e kier”, e sacerdote Karmacharya a declara na EFE riba e Kumari saliente, cu a wordo despedi cu honornan di estado.
Pa e famianan di e muchanan dios e eleccion hopi biaha ta un motibo di orguyo, a pesar di e aislamento cu e menornan ta pasa aden den e añanan siguiente.
E Kumari saliente a wordo dispidi cu honornan di ehercito y hiba den un carosa, escolta pa cientos di persona pa e cas cu el a bandona ya casi un decada pasa pa bira un dios infantil.
Fuente: https://www.efe.com