CIUDAD DE MEXICO, Mexico- Prome cos cu “Anthony” a haci ora el a wordo rescata, tabata di yora, pero yora manera cu bo ta yora di paden, segun esunnan cu tabata presente na e momento ey. Despues el a mustra cu su man cuanto aña e tin: cinco.
Su liberacion a bin door di un denuncia anonim, realisa pa un muhe cu a entrega un carta na esun encarga cu e Delegacion Gustavo A. Madero, Víctor Hugo Lobo, bisand’e :”lesa e carta aki cu hopi cuidao, mi ta gradicibo esaki”.
Den e carta e muhe tabata bisa, entre otro, cu e tabata ripara cosnan straño den e cas di su bisiña, y hopi biaha e tabata skucha un mucha ta yora. Despues di un investigacion di e denuncia, polis a actua.
Diaranson anochi, 27 di Juni polisnan a tene un razzia na e adres en cuestion.
Eynan, den e zolder, tur skur nan a bin haya Anthony. E tabata mara na cadena y tabata tin señalnan di desnutricion avansa, menos di 11 kilo pa un mucha di su edad. Tambe e tabata tin heridanan na su curpa, ademas di e señalnan di a ricibi varios golpi na su cabes, su pia y su brasanan.
Na e cas nan a detene un muhe y un homber di 32 y 33 aña di edad, cu lo wordo procesa pa e delito di privacion ilegal di libertad cu e motibo di causa daño.
Segun Ministerio Publico di Ciudad di Mexico a señala cu e menor lo por ta di Merca, ya cu a haya documentacion cu lo por prueba esaki, pa cual a pidi asistencia di e Embahada Mericano na e pais aki. .
Autoridadnan ta buscando na prome luga pa establece e identidad di e mayornan di e menor y unda nan ta, como tambe e vinculo, si tin esaki, entre e menor y esunnan deteni y tambe con e mucha a yega cerca nan.
Pa algun organisacion civil, e cautiverio di Anthony lo mester cende tur e alarmanan.
Juan Martín Pérez, Director di e Red pa e Derechonna di Infancia na Mexico, a bisa CNN cu lamentablemente “casonan asina, mescos cu di hopi otro mucha y adolescente ta pasa cu hopi frecuencia. Particularmente muchana cu ta presenta un discapacidad fisico of mental, cual ta ponenan den un situacion di indefensa total”.
Antony ta hospitalisa y ainda e tin un caminda largo pa bay, pa cura no solamente su heridanan fisico, sino tambe esunnan cu e ta warda den su alma, tur e anochinan, cu e tabata yora den silencia, yorando pero paden, pa niun hende no skuch’e”.
Fuente: www.cnnenespanol.com