HENAN, China- Varios camara di vigilancia a capta e manera cu’n traficante di persona a atrae un mucha cu’n co’i hunga den pleno luz di dia y ta bay cun’e. E mucha tin apenas 3 aña y ta di e ciudad Pingdingshan (Henan, China).
Segun informacionnan di medionan local, e incidente a tuma luga dia 18 di januari ultimo, despues di cu e delincuente a observa con varios menor cu tabata hunga sin vigilancia cerca di un tienda.
E tata di e menor a entrega denuncia di e desaparicion di su yiu muhe na polis. Di mes manera, autoridadnan a ricibi yamada di un chauffeur di un mototaxi cu tabata sospecha di un muhe cu tabata biahando cu’n mucha chikito cu tabata yora so.
Ora cu agentenan a aresta e muhe a bin resulta cu e tabata sordomudo, y mediante lenguahe di seña el a splica cu el a wordo paga 1500 dollar pa e trabao aki.
Autoridadnan a entrega e mucha bek na su mayornan.