TEXAS, Merca- E agencia federal di Aduana y Proteccion Fronteriso (CBP) a bisa cu e mucha homber chikito, localisa diamars mainta, a wordo “bandona” pa un grupo di supuesto inmigrantenan ilegal cu a crusa pa Merca for di Mexico, cerca di Brownsville, Texas.
Agentenan di Merca a haya e mucha di mas menos 3 aña yorando den un campo di maishi na e frontera cu Mexico, cu su nomber y un number di telefon scirbi den su sapato.
E agencia federal di Aduana y Proteccion Fronteriso (CBP) a bisa cu e mucha, haya diamars mainta
“Ora cu e agentenan a purba intercepta e grupo, e supuesto stranheronan ilegal a spart for di otro den e campo di maishi”, CBP a bisa den un comunicado.
E mucha, cu tabata “su so y yorando”, a wordo descubri durante un patruyahe y a wordo hiba pa un hospital local, unda cu a keda determina cu e ta den bon condicion, e comunicado ta sigui bisa.
Esfuersonan pa localisa su famia te cu awo no a duna resultado.
E menor, cu no ta papia suficientemente cla como pa comunica, ta wordo atendi den un centro di CBP y lo wordo entrega na e Departamento di Salud.
Segun CBP, agentenan di patruya fronteriso na maart a detene mas di 92 mil persona na frontera Mericano, compara cu e mas di 66 mil na februari. Entre e detenidonan na maart tabata tin 8.975 mucha sin compañante.
Presidente Donald Trump a bisa diaranson cu Merca lo manda soldaatnan arma na e frontera sur despues di cu soldaatnan Mexicano recientemente a “tira” ariba tropanan Mericano, intensificando e guerra verbal cu Mexico.
Trump, cu a haci inmigracion e centro di su menashe na votadonan conservador, a bisa tambe cu “un caravana grandi di mas di 20 mil persona”, ta avansando a trabes di Mexico rumbo pa Merca.