CAQUETA, Colombia- Na Florencia, Caquetá, tin consternacion despues di a conoce e caso di un menor di 10 aña cu a duna luz na un yiu, cual tabata producto di un abuso sexual cometi pa un miembro di su mesun famia.
Según e comandante di Polis di Caquetá, coronel Javier Navarro, una bes cu el a haya sa di e situacion hunto cu autoridadnan di Putumayo, unda cu e menor ta biba hunto cu su famia.
“Autoridadnan a haci e proceso di proteccion di derecho di e mucha aki di 10 aña a tuma. E ta un caso horibel, caminda cu, al parecer, miembronan di su nucleo familiar ta envolvi y nos ta trahando pa laga na disposicion di autoridad competente e responsabel di un hecho horibel asina”,e polis a bisa.
Según un reporte preliminar entrega pa e dokter Camilo Diaz, director cientifico di e Hospital Maria Inmaculada di Florencia, e baby a nace via cesarea. Tanto e mucha como e baby ta dne bon estado di salud.
“E pashent cu nos personal a atende ta un menor di 10 aña di edad y pa informacion di e Seccion Familiar di Putumayo, for di cual nos a haya informacion, nos a wordo informa cu e embaraso ta producto di un abuso sexual cometi, al parecer, pa un ruman homber di e menor”, Diaz a splica.
E Instituto Colombiano di Bienestar Familiar, y Ministerio Publico a asumi e caso y ta trahando di manera structura pa garantisa e derechonan tanto di e menor como esun di e baby y pa haci e investigacionnan al respecto.