Kralendijk, BONEIRO- Aki 2 dia pa ta eksakto djarason 15 di Mart ta bai tin elekshon pa Tweede Kamer. MPB ta konsehá tur hende ku tin derecho di voto pa hasi uso di nan voto. MPB ta konsehá pa vota pa partidonan ku semper a demostrá di tin un kurason kalor pa Boneiru manera partidonan D66 i CDA, no opstante ku MPB no ta di akuerdo ku tur punto di salida di e dos partidonan aki. For di 101010 Boneiru ta parti Hulanda i “Tweede Kamer” ta e parlamento pa Hulanda pero pa Boneiru tambe komo Entidat Públiko di Hulanda. Pa e motibu aki ta esenshal pa Boneiru tin bos den “Tweede Kamer” kaminda nos por influensiá desishonnan na fabor di BoneiruIi ta p’esei ta hopi importante pa nos bai vota diarason aki.
Dikon vota pa D66
Ariba lista di D66 tin e lider #1 Alexander Pechtold ku ta èks Minister di asuntunan di Reino. Tambe tin a kandidato #18 Antje Diertens ku a bishitá Boneiru 2 siman pasá pa presentá su mes na pueblo Boneriano. Antje Diertens di D66 ta bisa ku Hulanda tin su historia ku e islanan di Karibe Hulandes i ta e historia ei ta mara nos huntu. Hopi biaha nos ta pone muchu atenshon na kiko ta dividí nos na lugá di wak kiko ta uni nos. E tempu pa mustra dede ariba otro mester ta pasado e ora a yega pa huntu nos traha ariba nos futuro. Antje Diertens huntu ku D66 ta komprometé nan mes pa traha pa un desaroyo Sosio-Ekonómiko di Boneiru ku invershon den Enseñansa, Salubridat , energia duradero i ku hopi atenshon pa MANTENSHON DI NOS KAYANAN, ta palabranan di Antje Diertens.
Dikon vota pa CDA
CDA ta bisa lo siguiente : Ku ta bisto ku ta tempu pa un otro gobièrnu na Den Haag. Un gobièrnu ku realmente ke skucha e islanan BES. Tin palabrashonnan ku a hasi e tempu aya ku sekretario di estado Bijleveld di CDA, ku gobièrnunan ku a sigui no a ehekutá. Opservashonnan di eks minister Spies di CDA den e rapòrt di evaluashon te ahinda no a hasi totalmente nada kuné kaminda ku Hulanda a palabrá ku Boneiru ku e rekomendashonnan di e rapòrt di evaluashon Spies lo wòrdu respetá i konkretisá por medio di un plan di ehekushon ku Gabinete Hulandes lo mester tuma un posishon ariba dje.
Bai vota i duna Boneiru bos pa negosha cu Hulanda
MPB ta di opinion ku Boneiru den algu mas ku 6 aña komo parti di Hulanda a mira mehorashon grandi ariba tereno di entre otro Enseñansa, Salubridat i Kuido pa grandinan. Ariba diferente área Boneiru a bai hopi dilanti den 6 aña si nos kompará esaki ku 60 aña Antia. Pa a logra esaki Hulanda a invertí hopi den Boneiru. Sifranan ta indiká ku Hulanda a invertí minimalmente dòbel mas tantu ku Boneiru mes ta produsí na entrada. Esaki ta e benefisio ora nos ta parti di Hulanda. Ta p’esei MPB ta konsehá pueblo di Boneiru pa hasi uso di nan voto i bai vota diarason aki pa asina nos tin mas bos den “Tweede Kamer” por medio di un kandidato òf un partido ku nos ta sostené aki na Boneiru i asina nos por negoshá rekomendashonan di rapòrt di evaluashon Spies ku énfasis ariba un mihó forsa di kompra ku ta nifiká entre otro un mihó penshun i un mihó sueldo mínimo. Otro puntonan klave ku rapòrt di evaluashon Spies ta pone dede ariba dje ta un mihó siguridat i drechamentu di nos kayanan ku ta den hopi mal estado.