E asociacion profesional di fisioterapia di Corsou, Aruba y St. Maarten a firma un Memorandum of Understanding pa tin miho cooperacion entre nan, bou auspicio di Koninklijk Genootschap voor Fysiotherapie (KNGF) di Hulanda. Esaki a tuma luga fin di September, na Corsou, durante e Spinal Cord Injury Congres 2018.
E presidentenan; Jerry Brandon (Corsou), Marlon Maduro (Aruba) y Peter Prinsen (St. Maarten) a reuni hunto cu otro miembro di directiva, conseheronan y un manager pa maneho di calidad di KNGF. Nan a palabra pa traha mas intensivo riba e topiconan garantia y mantencion di calidad. Esaki ta un prome paso importante pa mehoracion den e maneho cu e 4 paisnan (Hulanda, Corsou, Aruba y St. Maarten) a palabra den un otro conferentia anteriormente, pa sostene otro den mehoracion di calidad den salubridad publico.
30.9.2018 Memorandum of Understanding
E presidentenan di e 3 asosiacionnan profesional di fisioterapia ta di opinion cu e exigencianan di calidad pa un fisioterapista mester ta mescos entre e islanan CAS y BES. Na e momento aki e exigencianan di calidad ta diferente pa cada isla; no tin, of nan ta minimal of nan ta formula irealistico. Door di traha hunto riba palabracionnan di calidad, den futuro lo por yega na garantia di calidad colectivo. E tres asosiacionnan profesional a presenta e puntanan aki na e representante di KNGF.
Na Hulanda KNGF ta representa e grupo mas grandi di fisioterapistanan y ta responsabel pa e
supervicion di e registro di calidad. Lo ta un tremendo posibilidad pa lanta un registro di calidad pa fisioterapia den Caribe cu ayudo di KNGF, ta opinion di e 3 presidentenan. Pa por logra esaki, politica, pero tambe e otro partnernan gobierno y seguronan, mester ta habri pa dialogo y coperacion.
E asosiacionnan profesional di fisioterapia lo purba dialoga cada un riba nan isla den e proximo lunanan. Nan ta conciente cu tin espacio pa drecha e calidad di fisioterapia riba e islanan menciona, y nan kier participa activamente den e decicionnan riba e tereno aki pa e exigentianan ta realistico y alcansabel. Tin e tendencia pa implementa exigencianan mucho abrupto di Hulanda cu tin resultadonan negativo pa e grupo di profecion/profesional aki. P’esey e tres presidentenan kier a yega na e Memorandum of Understanding pa nan cuminsa parti informacion, traha hunto y yega na solidaridad den Caribe.
Fuera di calidad por trata otro topiconan di fisioterapia. Entre e ministerionan di salud di e cuatro paisnan a haci palabracion pa hunto traha riba programanan di prevencion, recapacitacion di profecoinalnan den cuido y stimulacion di un bida saludabel, deporte y movecion
Tur ta temanan na unda e fisioterapista por hunga un papel principal.
Esaki kiermen cu e fisioterapista por duna un conseho importante pa realisa e puntonan cardinal den e conferencia entre e cuater paisnan. E asociacionnan ta habri pa dialogo.