KINSHASA, Congo – Na Congo-Kinshasa, sigur 44 persona a wordo mata durante accionnan di presta contra e presidente Congoles, Joseph Kabila. Esaki ta segun Human Rights Watch diamars. En total servicionan siguridad a mata 37 demostrante, kende na su turno a mata 7 agente y un militante di Kabila.
Dialuna e cantidad di morto tabata riba 20, ora cu un demostracion den e capital Congoles a bay for di man, unda cu 17 civil y 3 agente a fayece. E anochi despues y riba diamars, hopi mas victima a cay, ora cu servicio di siguridad a ataca edificionan di oposicion. Un di nan a wordo cendi na candela.
Kabila
Desde dialuna tin disturbio den e pais, pasobra e ciudadanonan ta exigi pa e presidente Congoles, Joseph Kabila baha. Desde 2001 e ta na mando y a wordo scogi dos biaha. Su presidencia ta dura te cu December, y segun ley e no mag di wordo reeligi. Segun contrincantenan politico e ta purba di wanta e proximo eleccionnan pa asina alarga su presidencia.
Congo-Kinshasa conoce ya pa varios decada un historia di violencia. Desde 1960 cu el a bira independiente di Belgica, e pais no tabata tin ningun cambio di mando pacifico. For di 1971 te cu 1997 e pais tabata yama Zaire.
Fuente: NRC