Diadomingo merdia e atleta elite den e deporte di taekwondo, Monica Pimentel hunto cu coach di seleccion, sr. Teofilo Rodriguez a sali pa Muju, Sur Korea unda e campeonato mundial di taekwondo lo tuma lugar otro siman. Na nos aeropuerto Internacional Reina Beatrix, representantenan di Lotto sr. Di Stefano Wernet RA y sr. Flavio Faneyte a despidi di e atleta Pimentel y coach Rodriguez.
Prome cu su salida Sr. Di Stefano Wernet RA den number di Lotto a dirigi algun palabra na e delegacion.
“Ora bo ta un top atleta di bo pais den cualkier competencia den exterior, bo ta un embahador di Aruba den wowo di tur hende, e porta den deporte pero tambe den turismo. Ora un top atleta cu ta produci y yega leu bo ta haya turistanan ta bira fanatico di e atleta y bishita su pais di origen. Ora bo ta un top atleta bo mester hasi sacrificio, bo mester tin determinacion y corahe, bo ta crea respet y disciplina. Bo ta bira un ehempel pa e hubentud cu ta admira bo esfuersonan. Pa e motibo aki tambe Lotto, Minister di Deporte y Sport Subsidie Commissie ta aporta y sigui kere den nos deportistanan elite. Deporte a bira un tipo di negoshi, bo mester inverti pabo por saca probecha bek despues. Claro cu esaki ta bay segun bo recursonan financiero na disposicion. Awendia si bo kier logra lo maximo mester inverti no solamente den atleta pero tambe den coach, dirigentenan, miembronan di directiva , ect tur mester amplia e conociemento pa asina por traha riba un base mas solidoy profesional”, Sr. Wernet a bisa.
Pa tanto Monica, su coach Teo y presidente di Aruba Taekwondo Bond esaki ta un oportunidad unico pa Aruba un biaha mas. Monica ta dedicando full time den su deporte y kier yega leu den esaki. E experiencia di Weganan Olimpico di Rio ta unico y ta sinti cu lo por logra yega un wega Olimpico mas si e logra drenta den e Grand Prix di taekwondo. Pa Aruba esaki lo bira un otro oportunidad y lo por habri porta pa lo demas atletanan di taekwondo.
Hopi exito den e mundial di taekwondo Monica. Aruba ya caba por ta orguyoso dibo.