Recientemente e atleta elite Arubano den e deporte di taekwondo Monica Pimentel hunto cu coach nacional di Aruba, sr. Teo Rodriguez a bishita St. Fundacion Lotto pa Deporte pa asina papia un poco di su preparacion pa e Mundial di taekwondo e proximo luna na Seoul, Sur Korea. E atleta Pimentel hunto cu coach Rodriguez a wordo ricibi pa Presidente di St. Fundacion Lotto pa Deporte, sr. Di Stefano Wernet RA y sr. Flavio Faneyte mienbro di bestuur di Lotto.
E campeonato mundial ta di suma importancia pa e atleta Monica Pimentel paso aki e lo trata na logra su clasificacion pa asina drenta den e Grand Prix di taekwondo unda e miho 32 atletanan rond mundo so lo competi pa asina bringa den eventonan di taya manera e campeonato Mundial y Weganan Olimpico. E atleta Pimentel di Aruba falta solamente 11 punto pa drenta den e top 32 y ta spera di por logra esaki durante di e campeontato mundial cu lo ta di 24 pa 29 di Juni proximo. Hunto cu su coach Rodriguez, Monica lo biaha un siman mas tempran pa Sur Korea. Mester bisa cu durante di e campeonato mundial Monica lo bringa den e categoria – 53 kg, mientras den e Grand Prix, Pimentel lo bataya den e categoria di – 49kg. E Grand Prix di taekwondo lo inicia den luna di September 2017.
Na 2016, Monica Pimentel a haci historia pa Aruba door di bira e prome atleta den e deporte di taekwondo cu a logra clasifica pa un Weganan Olimpico, den e caso aki Rio de Janeiro, Brasil. Durante di e clasificacion na Aquascalientes, Mexico, e atleta Pimentel a logra finalisa ma un di dos lugar den su categoria cual tabata suficiente pa yega Rio de Janeiro. Monica a biba varios aña den exterior y a sigui cu su deporte di taekwondo y semper representando Aruba cu tur honor.
Den nomber di di directiva Lotto pa Deporte, sr. Di Stefano Wernet RA a desea Monica y coach Teo tur clase di exito na Sur Korea. Lotto bow nos Ministro di Deporte Dr. Alex Schwengle ta sigui aporta cu vision & accion na deporte di Aruba.
Lotto, e Lottoteria National di Aruba ta sigui cambia bida di nos atletanan!