AMSTERDAM, Hulanda – “Esaki ta e di 34 titulo y e tin un nificacion. Nos kier dedica esaki na Appie”. Esaki tabata palabranan di e delantero di Ajax Matthijs de Ligt cu a causa furor cerca e fanaticonan cu a asisti masalmente riba e Museumplein durante e homenahe na e campeon nacional.
E famia di Abdelhak Nouri tambe tabata ariba escenario. Tata Mohammed a dirigi algun palabra. “E soño di mi yiu a bira realidad. Danki na boso tur. Nos ta Ajax, nos ta e miho”! Despues di esaki e euforia tabata grandi cerca e fanaticonan.
Despues, De Ligt cu a drumi poco e anochi anterior, a hiba palabra un biaha mas. El a pasa man cu microfon y a dirigi su mes na e publico presente.
“Nos a gana di Bayern München, nos a gana Real Madrid, Juventus… Niun hende no por stop nos. Nos a bira campeon, nos a gana e copa y na ultimo, ta wordo elimina for di e semi- final di Champions League”.
“Pero loke ta mas importante: nos ta demostra kico tur Ajax tin aden. Y ki sorto di ciudad Amsterdam ta. Nos a demostra kico nos ta para pe. Y esey ta un futbol atacante”.
Riba e plasa tabata tin mas o menos 100 mil persona presente durante e homenahe.