Empleadonan hunto cu famia a reuni pa un momento di reflexion y conscientisacion durante earth hour 2018
Diasabra anochi dia 24 di maart entre 8:30 y 9:30 di anochi a tuma luga “Earth Hour 2018”. Na e ocasion aki, un grupo di empleadonan acompaña cu famianan a reuni na Bestuurskantoor y a cende bela den e simbolo di 60+, pa ilustra y motiva comunidad pa paga tur luz pa por lo menos 60 minuut.
Ministerio encarga cu Medio Ambiente kier a gradici cada persona cu tabata presente diasabra anochi na Bestuurskantoor durante Earth Hour y tambe cada persona y organisacion aki na Aruba cu pa por lo menos un ora a paga luz y aparatonan electronico, pa di e forma aki para keto riba e importancia di nos medio ambiente y nos planeta. Principalmente e efecto cu nos tin como ser humano riba esaki.
Na e ocasion Prome Minister sra. Evelyn Wever – Croes tambe tabata presente y a hiba palabra na tur esnan cu e momento ey tabata presente na Bestuurskantoor. Prome Minister a mustra riba e importancia di conservacion di nos planeta pa futuro generacionnan pa cual e ta haye importante pa para keto riba e fecha aki pa hunto conscientisa otro.
Como Gobierno Prome Minister a elabora riba e hecho tambe cu tin diferente iniciativa pa bay mas riba energia renobabel (energia limpi). Cu e meta pa nos consumo di energia afecta nos medio ambiente menos cada biaha, Prome Minister a termina bisando.