WASHINGTON, D.C., Merca- Awasero friu, ijzel y sneeuw lo cay a lo largo di e parti zuidoost di Merca, diaranson. Esaki ta habri caminda pa un brutal tormenta di invierno cual ta spera cu e lo bira mas fuerte segun e bay ta avansa pa noordoost.
Esaki lo por ta e prome biaha den hopi aña cu den algun parti di zuidoost di Merca, sneeuw ta cay. E habitantenan di Tallahasse, Florida ta spera un inchi di sneeuw y ijs pa diaranson, pero e ciudad no tabata tin temperaturanan asina abao desde 1989, segun e meteorologo di CNN, Michael Guy.
Gobernador Nathan Deal a emiti un estado di emergencia diamars pa 28 condado di Georgia den e zona costera prome cu e tormenta.
Autoridadnan a urgi personanan pa keda nan cas, ya cu miyones den e mita di e parti oost di Merca ta enfrentando temperaturanan bao di cero. Hopi scol a cera y e oficinanan di gobierno a cera full e costa di Flordia y full e oostkust.
Florida, e parti zuid di Georgia e costanan di North y South Carolina lo tin un poco centimeter di sneeuw y algo di ijs prome cu e tormenta comberti su mes den un tormenta monstruoso, lagando gran cantidad di sneeuw a lo largo di e costa Atlantico y pa e parti noordoost, segun meteorologonan.
Al menos 12 persona a muri na Merca door di e frieu di diamars pa diaranson.