Miyones di dollar tabata wordo paga pa yiunan di celebridadnan wordo admiti na scolnan elite

CALIFORNIA, Merca -Un decena di persona, entre cual actriznan di Hollywood, Felicity Huffman y Lori Loughlin, a wordo acusa di a paga sumanan miyonario na soborno pa nan yiunan a wordo admiti na universidadnan prestigioso, segun documentonan hudicial revela diamars na Boston.

Den un conferencia di prensa, fiscal Andrew Lelling a saca na luz publico un red di corupcion na personanan rico cu tabata paga te cu 6,5 miyon dollar pa nan yiunan drenta universidadnan prestigioso manera Yale, Stanford, Georgetown, University of South California, UCLA y Un Texas University.
Autoridadnan a declara cu e “estafa” tabata consisti den soborna e examinadornan, cumpra e administradornan di e proceso di admision y paga trainernan pa e postulantenan wordo acepta como atletanan cualifica, independientemente di nan habilidadnan deportivo.
E fiscal a revela cu algun mayor a gasta entre 200 mil y 6.5 miyon dollar y cu e pagonan a sigui te cu luna pasa. Ta conoci tambe cu e lider di e estafa, William Singer, propietario di un compania consultor di admision na universidadnan, cu tabata encarga cu e administracion di e placa pa regla e admisionnan. Singer a ricibi un total di mas di 25 miyon dollar entre 2011 y 2018.

Segun e informe, entre e 50 personanan acusa tin Lori Loughlin, actriz di ‘Full House’ y e strea di e serie ‘Desperate Housewives’ Felicity Huffman, cu tabata enfrenta cargonan di consiperacion criminal pa comete fraude.

Riba e lista ta haya tambe e casa di Loughlin, Mossimo Giannulli, cu hunto cu e actriz a paga 500 mil dollar na e University of South Californa pa e admision di nan dos yiunan, miembro di e ekipo di remo, aunke den realidad nan no tabata practica e deporte aki. Di otro banda, Huffman lo a paga 15 mil dollar pa su yiu muhe a haya yudansa adicional den e examen di ingreso.

Comments

comments