Mas di 4 miyon di bari di crudo Venezolano y tambe fuel ta para pornada den tankinan mara den lama Caribe. Nan no por yega nan destino, pa motibo cu PDVSA, compania petrolero controla door di estado Venezolano, no por paga pa limpiesa, inspeccion di tankinan y tampoco pa otro gastonan portuario. Esaki segun documentonan interno.
Por lo menos un decena di tankernan ta wordo wanta, pa motibo cu e tankinan a wordo susha door di e crudo. Esaki ta data for di varios leak di petroleo den e ultimo aña den puertonan esencial manera Bajo Grande y Jose, cual a resulta den delay den e operacion di carga y descarga.
Door cu PDVSA no por paga pa haci e limpiesa di e tankernan, nan mester warda simannan largo den awanan internacional, cual ta crea un tardansa den e cargamento.
Tankernan sushi ta un problema mas riba e lista largo cu PDVSA tin. E compania aki ta esun cu ta genera gran parti di entrada pa e pais y ta crucial den e presupuesto di Gobierno.
Produccion di petroleo y exportacion na e momentonan aki, e ta den su momento mas abao den dos decada. Esaki a trece dificultad pa gobierno cumpli cu su debernan financiero, cual a trece un recesion den e pais exportado di petroleo aki.
Tambe tin un cargamento di 520 mil bari di crudo destina pa China. Pero e cargamento aki ta pega na Corsou, cu’n retraso di mas di 100 dia, te ora cu nan ricibi un pago.
Leynan maritimo ta prohibi tankernan sushi di nabega den awanan internacional, te ora cu e tankinan wordo haci limpi. Mientras PDVSA su debenan ta crece, e leaknan no a wordo drecha te ainda, asina ta cu decena di tankernan ta biahando dentro di e pais mes, y asina hiba e problema na otro terminalnan, incluyendo Puerto la Cruz, La Salina, Cardon y Amuay.
Limpiesa, cual ta wordo haci na Puerto Guarano, cerca di e refineria mas grandi di Venezuela, ta dura algo mas cu dos luna den algun caso.
Un derame di crudo na Januari a susha mas tanker, e biaha aki afectando barconan cu tabata sperando crudo pa wordo exporta.