Nos flamante Miss Aruba señorita Charlene Leslie, ta acaparando atencion mundialmente! For di dia cu nos Miss Aruba a biaha pa Manilla, Filippinas y na su yegada dia 13 di januari 2017, e ta causando furor. Ta pidi pueblo di Aruba, pa ban vota masalmente pa Miss Aruba 2016/2017
Charlene ta halando hopi atencion di e pueblo Filipino, fanaticonan di certamennan di Belleza (missosologonan) rond mundo y prensa internacional. Sigur si tuma na cuenta su bon educacion y su carisma inigualabel. Esey ta hopi notabel durante e certamen di Miss Universo 2016 cu ta tuma lugar aya na Filippinas. E certamen ta tuma luga dia 30 di januari 2017 aya na Filipina y cu ta ser transmiti en vivo dia 29 di januari 2017, pa 8:00 pm en adelante na Fox TV. Teniendo na cuenta e 12 oranan di diferencia.
Charlene a resalta den varios di e eventonan di Miss Universe, e.o. e Fashionshow cu a wordo organisa entre e 86 candidatanan y aki por a admira e gran modelo di taya internacional cu nos Miss Aruba ta. Tambe el a ricibi un bonbini special na e ciudad di Bagiou, por medio di nos eterna Miss Aruba Maureen Vieira (4e finalista Miss Universo 1974, kende a zorg pa esaki pa medio di su conocirnan). Esaki ta hopi comenta den rednan social. Nos Miss Aruba ta destacando unda cu e yega cu su estatura imponente di 1.83 m y su elegancia di kita sombre!
Charlene ta tin e oportunidad di conoce diferente aspecto di e cultura Filipino y e bunita ta cu Charlene den su etapa di preparacion tawata tin contacto cu e Consul Honorario di Filipina akin a Aruba y a siña hopi di nan cultura, idioma y con pa saluda den esaki (Mabuhay!).
E aña aki e organisacion di Miss Universo a introduci un sistema pa por vota entre e 86 candidatanan di rond mundo pa un luga den e 12 semi finalistanan. Tin anuncia cu lo scoge 12 finalista, despues 6 y despues 3 top finalista! Esey kiermen ban vota pa apoya nos Miss Aruba pa asina engrandece su chens pa e drenta e Top 12 den e certamen di Miss Universo 2016/2017 na Manila, Filipina.
Con ta vota:
1. Miss Universe App. Download e app aki. Bay na e Menu y scohe Miss Aruba Charlene Leslie.
2. VODI app: Download e app aki y bay na ‘voting’ scohe Charlene Leslie, Miss Aruba 2016.
3. Twitter: Haci bo account publico. E account mester tin mas cu 10 followers. Tweet usando #Miss Universe, # Miss Universe Aruba 2016, Charlene Leslie.
4. Bishita e website oficial di missuniverse.com. vote.missuniverse.com, scoge Nos Miss Aruba Charlene Leslie y vota pe!
Pa tur esakinan por vota maximo 10 biaha pa dia!
Por sigui e desaroyo di nos Miss Aruba via Instagram y Facebook:
#MissUniverse
# MissUniverseAruba
Ban apoya nos Miss Aruba masalmente y engrandece su chens pa clasifica: vota pa nos Miss Aruba 2016/2017, Charlene Leslie.