Angela Ponce, di 26 aña y modelo, a gana e titulo di Miss Universo Spaña despues di e competi cu 22 otro candidata. E lo competi na November proximo na Filipinas. E lo ta e prome muhe abiertamente transexual cu lo competi den e concurso di Miss Universo.
Ponce ta homber di nacemento y na e edad di 11 aña, el a descubri kico kiermen transexualidad y asina a cuminsa e proceso di transforma den un muhe. E ta bisa cu desde e tabata un mucha, semper el a sinti cu e tabata diferente di e otro mucha hombernna. Na 2014, el a haci e cirugia pa completa su transformacion di homber pa muhe. Tambe e tabata bou tratamento hormonal pa añanan largo.
Ponce, cu ta procedente di Sevilla, tabata tin su prome aparicion grandi den e mundo di concurso na 2015 den Miss Mundo Spaña representando Cadiz. El a perde esaki y Miss Barcelona, Mireia Lalaguna Royo, cu a gana e titulo e aña ey. Un regreso espectacular.
E competencia di Miss Universo pa prome biaha a admiti muhenan transexual pa competi na 2012, ora cu Jenna Talackova a bringa pa su derecho di competi den Miss Universo Canada. Talackova despues a sali den e Top 12, y tabata un di e cuater candidatanan pa wordo yama “Miss Congeniality.”
Treciendo e nomber di Spaña y su colornan dilanti den e Universo ta un gran soño dimi”, Ponce a scirbi riba su Instagram despues cu el a gana. “Mi meta ta pa ta un vocero di e mensahe di inclusion, respet y diversidad no solamente pa e comunidad LGBTQ, pero pa mundo henter”.