Nos Miss Aruba Srta. Charlene Leslie ya caba tin 1 siman na Filipina unda cu e ta participando den diferente desfile y photoshooting. Un noticia grato cu nos a ricibi ta cu nos Miss Aruba a wordo scogi pa ta un di e 5 modelonan cu mester a saca potret cu e mercancia oficial di Miss Universe.
Esaki sigur ta mustra cu e organisacion ta reconoce su potencial como modelo.
Charlene ta conta nos cu su dia ta cuminsa rond di 4:30 am y ta termina rond di 1:00 am tin dia. E ta un trabou duro pero e ta haciendo e cu hopi amor pa Aruba. Charlene a ricibi un sorpresa hopi grato ora cu durante parada na Baguio el a mira un spandoek cu su nomber y potret yamando e bonbini, esaki a toca su curason y a keda masha agradecido na e respaldo y apoyo cu e ta ricibiendo.
Dia 23 di Januari e sistema di votacion lo habri y aki ta unda cu Aruba mester uni y vota en grande pa nos Miss Aruba. E ganado lo tin un spot garantisa den e 12 finalistanan dia 29 di Januari, 2017. Pa sa con pa vota por bay riba Charlene su facebook page “Charlene Leslie” y sigui e instruccionnan.
Nos ta pendiente tambe di e delegacion cu lo sali pa bay apoya nos Miss Aruba diadomingo awo. Di e forma aki nos lo ricibi mas informacion cu nos lo comparti cu Aruba completo.