Desde dialuna ultimo, a cuminsa conferencia di di e asina yama ‘The Association of Caribbean Commissioners of Police’, esta ACCP. Esaki ta e di 32 bes cu e ta wordo organisa y esaki ta e di dos biaha aki na Aruba. E prome tabata dies aña pasa, pero segun e propio organisacion ACCP, cu esaki ta e di 32 conferencia cu ta wordo teni anualmente y esaki ta esun di mas grandi, esta cu mas tanto participacion. E topico di discusion principal e biaha aki ta ‘Globalization and Transnational Organized Crime’. E topico nan aki di discusion ta wordo teni den sesionnan priva cu tur e alto mando policial di diferente pais, mientras cu tin varios instructor di rond mundo cu a bin pa duna workshops na miembronan di nos cuerpo policial. E conferencia di un siman largo, cu a cuminsa dialuna ultimo y lo culmina diabierna, tambe a ofrece presentacion di materialnan mas moderno pa cuerpo policialnan rond mundo. Varios ta e companianan renombra internacionalemte a bin cu nan materialnan pa mustra kico tur nan ta ofrece. Minister encarga cu Husticia sr. Arthur Dowers hunto cu minister di Economia sr. Richard Arends, a presencia varios di e exposicion nan di e companianan presente. Algo cu sin duda algun ambos mandatario a keda fascina cu tur e tecnologinan moderno cu no solamente Cuerpo Policial di Aruba, pero varios otro departamentonan gubernamental por haci bon uso di algun tecnologia pa brinda un mihor servicio aun na nos comunidad. Comentario cu ambos mandatario a duna ta, cu nan ta opina cu e pueblo aki di Aruba semper ta central y cu mester keda inverti na bienestar di nos cuidadano nan.