Ministerio Publico y Cuerpo Policial di Aruba ta tene diaranson awor 23 di November, un reunion tematico den cuadro di intensiva e cooperacion di e dos departamentonan. E reunion tematico aki lo tuma lugar na Marinierskazerna na Savaneta y lo consisti di varios workshop, cu lo trata di –entre otro- comunicacion y relacionnan di autoridad entre Ministerio Publico y Polis, investigacionnan y e TGO’nan (Team Grootschalig Onderzoek o sea investigacion di escala grandi).
E Procurador-Generaal di Aruba, e Advocaat-Generaal, Fiscal Mayor di Husticia y e fiscalnan, como tambe e Korpschef y e top di recherche di Polis lo participa na e workshopnan. Minister di Husticia lo habri e atardi special aki.
E importancia di un cooperacion estrecho entre Ministerio Publico y Polis, ta papia pa su mes. E convenio cu a wordo firma siman pasa tocante e asina yama Fusion Center, ta un bon ehempel di con instancianan hudicial ta cera cabes hunto, cu e meta comun pa yega na un combatimento mas eficiente di criminalidad. Den e construccion di e Fusion Center, e instancianan por comparti informacion na un forma intensivo. E reunion di diaranson awor entre Ministerio Publico y Polis ta pas den e pensamento nobo aki di Husticia na Aruba.