Ministerio Publico Venezolano a duna di conoce e detencion di e ex-minister di Petroleo Tareck El Aissami, kende a wordo relaciona cu e supuesto skema di corupcion conoci como ‘PDVSA Cripto’. E notificia a wordo confirma pa Fiscal General, Tarek William Saab, kende a comparti imagen di e operativo di e aresto di e ex-funcionario.
Segun Saab, e captura di El Aissami a tuma luga, despues cu por lo menos cinco testigo a suministra informacion relevante durante e entrevistanan realisa p’e fiscalnan y e organonan auxiliar di Husticia. E declaracionnan aki a hunga un papel fundamental den e decision di detene e ex-minister kende tambe a eherce e funcion como presidente di e compania estatal Petrolero Venezolano den pasado.
Den e proximo oranan, ta spera cu El Aissami wordo presenta y registra pa Ministerio Publico, loke ta indica cu nan ta tumando medida legal formal den su contra. Fuera di e ex-minister, otro di e detenidonan relaciona cu e caso aki ta ex-minister di Economia, Simon Zerpa Delgado.
E detencion di El Aissami ta representa un desaroyo importante den e lucha contra corupcion na Venezuela. Su aresto a genera un gran impacto den e pais, specialmente pasobra e tabata un figura destaca den e gobierno. Esaki ta refleha un esfuerso continuo di parti di autoridad pa combati corupcion den e administracion publico Venezolano.
E caso di PDVS cripto ta solamente un di e hopi scandalnan di corupcion cu a afecta Venezuela den e ultimo añanan. E detencion di El Aissami ta un indicacion cu autoridad ta comprometi pa atende e problema aki di manera firme y decidido. Sinembargo tambe nan ta trece interogante riba e alcance y e implicacionnan di e caso aki den e panorama politico y economico di e pais.