Relaciona cu e caso unda na residencia di Alberto Groeneveldt na Seroe Blanco a haya un cacho den un mal estado cu te hasta e cacho a perde su bida, a conmove e pueblo di Aruba. E fundacion cu a restaca e cacho a haci denuncia na recherche unda te hasta recherche a interoga Alberto.
Despues di par di siman Alberto a sali afo y a papia cu prensa y splica su banda y e ta lamenta loke a pasa y negligencia a pone cu awor e ta mal mira den comunidad. Hopi a pidi p’e bay cera pero e ley pa cu bestia ta minimo cu no por a haci mucho.
Por a tuma nota cu Corte a manda un rol cu ta indica cu 22 di mei 2024, pa 8:40 mainta Alberto lo ta presente dilanti Huez.
Esaki ta loke cu Ministerio Publico lo persigui Alberto cune:
G. ta wordo acusa di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, dor di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, dor di keda sin duna e cacho cuminda y/of awa pa e bebe y/of cuido pa su heridanan y/of remedi.
E ta wordo acusa di varios biaha, den e periodo di prome di januari 2024 te 26 di maart 2024, como doño di un of mas cacho, a keda sin cumpli cu su obligacion di duna e cacho(nan) aki e cuido necesario, dor di duna e cacho(nan) insuficiente cuminda y/of di duna e cacho(nan) insuficiente awa y/of di keda sin duna e cacho(nan) cuido medico necesario di un veterinario y/of di keda sin duna e cacho(nan) suficiente espacio pa nan move.