Diahuebs 4 y diabierna 5 di october Ministerio Publico (OM) a organisa pa su trahadonan den cuadro di Learning & Development (Enseñansa i Desaroyo) y Team Building un evento di dos dia. coleganan di islanan BES, Sint Maarten, Aruba y Corsou tur a bini hunto.
Diahuebs 4 di october tabata tin pa prome biaha e Academy di OM na Corsou. E prome dia tabata den cuadro di Enseñansa y Desaroyo. E programa di mainta a cuminsa cu un charla di e psicologo Micha van de Vorst. Den un forma interactivo e la trata e tema di con pa maneha situacion nan fuerte y violento cu bo ta topa den trabou. Resto di dia coleganan por a atende diferente workshop. Por a scoge den workshop nan dirigi riba desaroyo di conocemento huridico of desaroyo personal. Tabatin suficiente espacio tambe cu coleganan por a conoce otro mas miho. A cera e dia cu un actividad di teambuilding caminda cu coleganan por a demostra nan talentonan musical na un manera chistoso y interactivo.
E siguiente dia e reunion di Parket grandi (GPV) a tuma luga. GPV ta un evento anual caminda tur colega di OM den Caribe ta bini hunto pa trata un tema specifico. E aña aki a toca turno na e tema di Integridad. Den e trabou di OM, integridad ta un tema cu ta para central y ta di gran importancia cu coleganan por trata e tema aki hunto y siña con pa atende cu cuestion nan di integridad. Parti merdia tur colega a traha hunto den un sesion creativo na diferente pintura cu na final a forma cuater diferente cuadro. E cuadronan a ilustra caracteristico di e diferente islanan.
Esaki sigur a contribui na e colegialidad di tur e participante nan. A cera e dia cu un brindis hunto cu tur colega cu a participa.
Ministerio Publico por mira tras na dos dia educativo y exitoso.