Soborno, ricibi informacion secreto di un ambtenaar y forma parti di un organisacion criminal, ta e cuater acusacionnan cu Ministerio Publico a presenta cuater miembro di prensa. Ta trata aki di Nelson “Speed” Andrade, Norben Giel, Richard Lacle y Brian Koolman.
Pa Andrande Fiscal a pidi un castigo di 24 luna, mirando cu den pasado e tabata envolvi den un caso similar; pa Giel y Lacle a pidi 18 luna di cual 8 luna ta condicional y den caso di Brian Koolman a pidi un castigo di 6 luna condicional. Sentencia lo ta dia 18 di december awo.
Tratamento a dura un dia completo, menos tempo di loke a calcula.
E caso aki tin di haber cu investigacion di e funcionario policial Robert Vos, New York, kende mientrastanto a sinta su castigo caba y ta na cas. El a haya 16 luna di cual 8 luna ta condicional y tres aña di prueba. Ministerio Publico di su banda a apela e decision.
Durante tratamento di e caso a repasa practicamente tur informacion cu a bini dilanti den caso New York pa uza esaki contra e cuater periodistanan, kendenan ta nenga di a paga Vos pa haya informacion.
E abogado di Koolman, kende ta studiando na Hulanda, a trece dilanti cu su cliente no tin amistad cu Vos, y esey e propio ex-Polis a indica tambe. Durante investigacion di caso New York a haya tres laptop na cas di Vos conecta riba portofoon di polis, pero abogado mr. Canwood a trece dilanti cu den henter e dossier no tin ningun prueba cu esaki ta pertenece na un di su clientenan.
Giel di un banda ta un conoci / amigo di Vos pa hopi aña caba y den e cuadro ey a yega di prest’e placa,cu el a paga bek. Esaki ta wordo confirma door di e mesun Vos tambe. Y Andrade di su banda a yega di haci diferente donacion pa proyectonan di Vos.
Pero den henter e dossier por saca afo cu pasobra Vos a yega di duna nan informacion, a dun’e sponsership of a yega di prest’e placa. Tambe ta berdad cu Andrade a yuda Vos drenta den contacto cu un persona cu a prest’e placa sin paga interes.
A wordo mustra cu Andrade ta un persona cu ta yuda hende, for di su mesun saco, famianan of esnan cu tin famia di adictonan cu ta sigui tratamento den exterior, sin pidi nada a cambio.
Giel ta bon amigo di Vos pa hopi aña caba. Y den pasado a prest’e placa ora cu e tabata den problema grandi. E no a haci esaki sperando cu hopi aña despues Vos ta yud’e cu informacion, su abogado mr. Canwood a bisa Corte.
A bini dilanti cu Vos tabata sinti cu no ta haya aprecio di mando policial pa e trabou cu e ta haci di gara taxinan pirata, y pa e motibo ey tin biaha tabata avisa e miembronan di prensa ora cu e constata casonan di e indole aki.
E abogado a duna un relato largo di e situacion con prensa ta traha aki na Aruba, unda cu e buscamento di informacion ta limita. Contrario na Hulanda y Merca.
Sentencia lo ta dia 18 di december pa 8:15 A.M.
- Latest
