Dia 8 di juni Ministerio di Infrastructura y Medio Ambiente lo oragnisa un simposio titula: “Marine Protected Areas in Blue Economies, lessons to be learned”. Den cuadro di esaki Aruba lo ricibi bishita di un orador special cu ta miembro di e organisacion renombra mundialmente esta, Wereld Natuur Fonds Sr. Arjan de Groene. Sr. De Groene kende ta un ‘Ocean Expert Caribbean Netherlands’, lo comparti informacion sumamente importante pa locual ta nos medio ambiente, naturalesa y bida maritimo cu tin na Aruba.
Ministerio ta considera como parti di e responsabilidad pa semper haci e maximo esfuerso pa brinda oportunidad na comunidad en general pa por ricibi informacion di temanan importante y relevante. Aruba a yega na un etapa nobo unda cu e tema di medio ambiente mas y mas ta wordo reconoci como uno sumamente importante y Ministerio kier sigui promove conscientisacion di esaki.
Un invitacion ta bay na tur persona cu ta interesa den e tema pa ta presente na e tremendo simposio cu lo tuma luga dia 8 di juni den Aula di Universidad di Aruba cuminsando pa 6:00 di atardi te cu 7:30 di anochi. Lo tin diferente orador, pero manera menciona anteriormente e orador special lo ta Sr. Arjan de Groene di e organisacion WNF.
Ta haci apelacion na comunidad pa keda pendiente di medionan di comunicacion pa ricibi mas informacion den e dianan venidero tocante e simposio aki