Ministerio di Husticia su team ta preparando pa un competencia di Reino di hobennan cu ta forma parti di un grupo di prevencion cu yama “Alleen Jij bepaalt wie je bent”(Bo futuro ta den BO man).
Den combersacion cu Harvey Clement, coodinador di e proyecto pa ministerio di husticia, el a splica cu for di 3 pa 6 di October awor ta bay tuma lugar na Aruba Torneo di Reino, dirigi riba muchanan cu ta den un grupo di prevencion di e programa “Alleen Jij bepaalt wie Je bent” ( Bo futuro ta den Bo man). E ta un programa cu ta recluta hobennan p’asina por medio di deporte yuda preveni cu nan ta bay den mal caminda, y asina haña mas interes pa haci deporte.
E representante di Hulanda sra. Hanneke Sint hunto cu e representante di Binnenlandse Betrekkingen, Minister di Husticia Arthur Dowers y Harvey Clement a reuni recientemente riba e tema aki. E mandatario a ricibi basta informacion di loke a bin ta haciendo cu e grupo di hobennan aki y con nan ta wordo guia.
E torneo di Reino lo conta cu participacion di delegacionnan di Hulanda, Sint Maarten, Corsou y Hulanda, mientras cu mandatarionan di tur e paisnan menciona tambe lo ta presente. A haya informacion cu pa e evento special y di gran importancia aki ta bay bini tambe representantenan di Famia Real di Hulanda.
E delegacionnan lo cuminsa yega riba prome y 2 di October pa e ramonan deportivo cu lo tuma luga den Joe Laveist Sportpark.
Ta trata di un evento deportivo dirigi riba e grupo di hoben cu ta varia di edad 10 pa 17 aña y asina aki ta saca un man pa guia nan pa nan no bay den mal caminda. Na mesun momento mester laga nan sinti nan mes bon, principalmente durante e torneo na Aruba pa cual lo organisa actividadnan social tambe durante e siman cu nan ta na Aruba.
Minister Dowers ta hopi orguyoso cu su Ministerio a haya chens pa organisa un programa asina importante pa hobennan. E ramonan den cual lo tin competencia ta Basketball, Baseball y futbol. Como cu e evento ta tuma luga den temporada di Herfstvakantie ta haci un apelacion na mayornan pa trece nan yiunan pa presencia e diferente competencianan cu ta bay tuma lugar