No tin ningun maneho nobo di parti ministerio di husticia ora di biaha cu un menor di edad segun Minister mr. Andin Bikker.
Minister mr. Andin Bikker a reacciona den su conferencia di prensa diahuebs mainta riba un articulo publica den un matutino bou di e titulo “Gobierno a introduci rekisito pa biaha cu menor di edad”. Segun e mandatario den su splicacion a bisa cu esaki no ta berdad. Un pareha sea ta e mama of e tata biaha su so cu un of mas menor di edad, pa salida for di Aruba ta pidi pa un carta y copia di e otro mayor cu no ta presente cu e tin autorisacion di e otro mayor cu ta OK cu su yiu ta bay biaha sea cu e mama of e tata.
Cierto pais ta pidi un verificacion cu e persona cu a firma e carta di berdad ta e persona sea e mama of e tata. Un persona por traha un carta y pretende cu esun cu a firma ta e tata of e mama, y ora e yega e otro pais hopi biaha ta pidi pa un carta certifica. Cierto compania di biahe aparentemente a haya den pasado of reciente cu tin cierto pais ta pidi un carta cu apostilla pasobra esey ta metodo internacional cu e firma poni riba e carta ta di e persona cu a firme.
Segun Minister Bikker, esey ta e realidad y ningun momento su ministerio a emiti un maneho nobo. Pa esun cu ta biaha cu e mucha esaki ta pa siguridad y por evita un diferencia di opinion ora yega na otro pais. Pa loke ta burocratico den e articulo, esaki no ta e caso segun Minister Bikker pasobra e proceso tin su tempo. Si no indica cu tin urgencia pa biaha e ta dura un dia of dos, pero si indica cu mester biaha cu urgencia, e funcionario ta haci e proceso mesora.
E impresion cu e articulo den e matutino a crea segun e mandatario, cu gobierno di Aruba a dicidi riba un maneho y lo ta fastioso y burocratico etc, absolutamente NO ta berdad. Segun Minister Bikker e no a dicidi riba ningun maneho pa cu esaki. E instrumento legal ta den e caso aki, cu ta bay busca un certificacion y di eynan no tin ningun discusion riba e punto aki mas.