Ministerio di Enseñansa tin e grato honor di invita publico pa un screening oficial di e documentario “He named me Malala”. Den cuadro di celebracion di Aruba su luna nacional di enseñansa lo tene e evento aki unda cu lo enfoca riba e topico di educacion di mucha muher na Aruba y na resto di mundo. E evento aki lo tuma lugar diasabra 22 di October proximo cuminsando pa 6or di atardi den Cas di Cultura. Durante di e anochi Minister di Enseñansa Michelle Hooyboer-Winklaar lo dirigi su mes na publico y lo ilustra e ultimo informacion y datos pa loke ta e situacion di mucha muher den enseñansa na Aruba. Tambe lo tin un discussion den un panel cu expertonan local cu lo discuti riba e ultimo desaroyonan riba e topico aki. Como highlight di e anochi e publico por presencia e documentario di e popular Malala Yousafzai, un mucha muher orginalmente di Pakistan cu a bira e cara y voz pa derechonan di mucha muher pa haya enseñansa na su pais y rond di mundo. Un mucha muher cu un corage y determinacion enorme cu a wordo confronta cu un tragedia ora cu Taliban na su pais a purba silencia su voz. Malala Yousafzai ta e recipiente mas jong na mundo di e prestigioso premio nobel di paz pa tur su sacrificio y trabou como activista cu a para pa derecho di mucha muhernan rond mundo pa haya acceso na enseñansa. Un di e dichonan di Malala cu sigur hopi hende ta reconoce ta esun cu cual Malala a finalisa su discurso pa e asamblea general di Nacionnan Uni unda cu Malala a menciona “One child, one teacher, one book and one pen can change the world”. Ministerio di Enseñansa tabata e ultimo lunanan den contacto estrecho cu e representantenan di e orginasacion Malala Fund y ta contento di a ricibi e licencia oficial for di e organisacion pa tene un evento pa publico di Aruba.
Ministerio di Enseñansa ta invita publico en general pa asisti na e evento aki cu ta habri pa tur persona interesa. Admission pa e evento aki ta completamente gratis y ta a base di registracion. Tur persona interesa pa presencia e evento y e documentario di Malala por registra via email na [email protected] cu specificacion di nomber. E evento lo tuma luga diasabra awo, 22 di October 2016, di 6or di atardi pa 10or di anochi na Cas di Cultura.