Ministerio di Asuntonan Social ta e cartera di mas importante pa Aruba su existencia

Na momento cu e maneho di e cartera social bay malo, nos tin un problema mas grandi di locual nos ta pensa. Segun Parlamentario di partido MEP, sr. Hendrik Tevreden, e problema aki lo ta mas grandi cu CAft, mas grandi cu capital monetario y tur otro cos. E no lo ta un problema pa nos so, sino pa e futuro generacion cu tin di carga nos Pais.

“Mi ta pro autonomia. Pero ki bal bo ta autonomo si bo ta esclavo di bo circunstancia social?”, e parlamentario a puntra durante e reunion tratando presupuesto 2019. E Parlamentario ta expresa cu e kier duna tur e espacio necesario na e minister encarga cu cartera social y e profesionalnan den e ramo aki pa atende cu e actual crisis social, pero tin algun punto practico cu e kier remarca.

Atencion na trahadonan y cliente
Segun Parlamentario Tevreden, ta importante pa Minister enfatisa ariba un maneho di servicio. Tin buraconan entre e comunicacion di departamentonan, cual ta causa confusion y perdida di informacion valioso. Informacion no ta yega completo, of ni yega, y esaki ta devastador pa por trata e casonan di e clientenan optimalmente.

Pa bo por mehora e situacion, bo mester sa kico ta e peso di trabou actual na e departamentonan. Ki material falta, y cuanto personal falta y apesar cu den e plan di crisis a tuma nota den esaki, tin di crea un sistema pa monitor e asuntonan aki riba forma continuo. Tambe mester tene na cuenta cu cliente ta rey, pero sin trahado, no tin rey. Pues ta na su luga pa empodera, scucha y alivia e trahadornan y nan trabou riba veld, pasobra sin nan nos no por ehecuta e crisis plan efectivamente.

Ta na su lugar pa enfoca riba e duracion di tempo pa loke ta e procedura di servicio. Un trahado social tin e tendencia of e necesidad di haci trabou di curason y hopi bes ta keda mas cu e tempo necesario ocupa cu un cliente, pero e realidad ta cu mester calibra si esey ta efectivo na final. Asta esaki lo por conduci na un wachtlijst, mientras cu nos no kier pa hende warda demasiado pa haya servicio.

Un otro punto importante ta pa pone mas enfasis ariba un comision di keho, no pa sanciona trahadornan pero pa mehora e servicio na momento cu ta ehecuta e plan di crisis. Y tambe mehora aspectonan di e departamento pasobra despues di e plan di crisis, e departamentonan tin di sigui opera optimal. No por laga afo cu e Parlamentario ta di opinion cu e aporte na comunidad mester bira uno mas central. Esaki nifica cu den casonan di emergencia, mester tin un sinergia entre otro cu Sociale Zaken y FCCA pa casnan pa esnan cu mas tin mester pero segun e lista di Sociale Zaken.

Ta importante pa mas lihe posibel ehecuta e asina yama noodwoning (vivienda di emergencia), pa Sociale Zaken por uza esakinan na e momento necesario ya cu nan ta esnan cu ta topa cu e problema na prome instante.

Comments

comments