Diahuebs anochi Minister Ruiz-Maduro tabata presente na Beth Israel Synagogue y a participa den e ceremonia di Shoah na unda ta cende luz pa e alma di victimanan di Holocaust. Pa e ocasion aki tabata tin diferente invitado cu a ser yama dilanti pa Rabino Daniel Kripper pa cende bela. Normal ta cende 6 bela na e ocasion di Shoah, pero a toca Minister Ruiz-Maduro e honor pa cende e di 7 bela pa recorda tur e hendenan cu no ta Hudiu, pero cu a tuma risico pa yuda e Hudiunan durante e Holocaust.
Durante e conmemoracion di Shoah, Rabino Kripper a presenta e documentario titula ‘Defiant Requiem.’ E documentario ta conta e storia di curashi di e presonan Hudiu cera den campo di concentracion Nazi na Terezin, kende nan a lanta un coro di 150 persona pa canta na e Nazinan locual nan no por a bisa nan. E presonan a mustra nan resistencia a traves di e musica di Verdi.
Laga nos como comunidad den e dianan aki tuma tempo pa nos reflecciona riba e susedidonan durante segunda Guera Mundial y nan consecuencia pa humanidad. Laga nos corda tambe riba tur esunnan cu a demostra curashi y a pone nan mesun bida na peliger pa yuda otro den momentonan dificil den nan bida.