Minister Xiomara Ruiz-Maduro: Pa falta di tino Fraccion di AVP ta bandona Sala di Parlamento

Awe Fraccion di AVP a bandona Sala di Parlamento pasobra nan no a haya e comentario di CAFT riba e cifranan di e dos kwartaal di Gobierno di Aruba. CAFT a haya e cifranan parew cu Parlamento di Aruba y no ta cla ainda cu nan rapport. Ma esaki no ta kita afor e responsabilidad propio di cada Parlamentario pa lesa e informacion brinda pa Gobierno den e ‘Uitvoeringsrapportage’ (URK) pa di dos kwartaal. Pakiko mester warda un otro organo pa ‘kauw voor’ un opinion promer cu Parlamento of Fraccion di AVP mes por forma un opinion? Acaso Fraccion di AVP mes no ta compronde e rapport y mester otro hende pa haci e trabou di control pa nan?

Ta bon pa tene na cuenta cu CAFT ta tira bista riba e buki di Gobierno, e ‘huishouden,’ siendo cu Fondo Monetario Internacional (IMF) y companianan di rating Standard and Poor’s (S&P) y Fitch ta tira un bista hopi mas amplio riba full e sistema financiero y economico di nos Pais. Awor si bo tin riba mesa rapportnan positivo di S&P y IMF ta dicon bo ta nenga di atende un reunion importante djies pasobra falta un rapport di CAFT? Acaso Fraccion di AVP no ta compronde e rapportnan positivo di S&P y IMF?

Na mi parecer sea Fraccion di AVP no kier trata cu e berdad di Aruba su situacion financiero y economico, of nan tin berguensa di nan fayonan, of simplemente nan no tin tino pa atende cu e informacion positivo pa Aruba na un manera responsabel y ta prefera pa crea un ‘non-issue’ pa bandona un reunion importante na bienestar di Pais Aruba.

Comments

comments