Cada dia ta brinda nos e oportunidad nobo pa haci e cambionan necesario pa nos pais. Como gobierno nos ta trahando pa recobra e credibilidad financiero di pais Aruba. E mal maneho financiero hiba pa e gobierno anterior a pone nos Pais perde credibilidad financiero cual hasta a hiba nos pais bao di supervision financiero di Hulanda por medio di CAFT. Banda di esaki, e mal maneho financiero a trece consecuencia pa nos economia cu ta tranca desde 2015.
Como Gobierno nobo sigur e ta un reto grandi pa trece nos finanza publico bek na un nivel manehabel y sostenibel. E no ta un trabou facil, pero tampoco imposibel. Como mandatario nos a bin ta haci un esfuerso grandi pa yega na un presupuesto realistico pa nos Pais den e apenas algun luna cu e Gabinete aki ta na mando. E esfuersonan a wordo reconoci y pa 2018 gobierno a ricibi tanto den e prome como e segundo kwartaal conseho positivo di CFT riba e cifranan. Esaki ta muestra cu e ehecucion di Presupuesto 2018 ta bayendo den bon direccion y dentro di e cuadro financiero cu a keda fiha pa Parlamento.
Banda di esaki e maneho como Minister encarga cu Economia ta pa stimula, desaroya y diversifica nos economia. Gobierno su esfuerso ta concentra den busca e miho manera pa stimula e economia di nos Pais brindando e confiansa cu comercio por conta cu sosten, guia y incentiva di un Gobierno cu kier mira companianan chikito y mediano forma un fundeshi fuerte pa nos economia. Dentro di poco nos lo anuncia e sectornan cu ta brinda oportunidad pa inversion y hunto cu nan e incentivonan cu Gobierno kier brinda pa facilita e inversionnan necesario pa activa nos economia.
Por medio di cultura nos meta ta pa uni nos Pueblo, formando nos caracter como Pais, brindando tarima pa expresion di nos talentonan y oportunidad pa biba nos propio cultura. Formando parti di Gabinete Wever-Croes, como Minister di Finansa, Asuntonan Economico y Cultura nos tin un tarea grandi concentra den nos man, pero cu e confiansa den e sosten deposita den nos habilidadnan y cu e bendicion, forsa, pasenshi y sabiduria brinda pa Dios, nos ta haci uzo di e oportunidad cu ta presenta cada dia pa haci e cambionan necesario na bienestar di nos Pais. Nos ta convenci cu hunto nos ta logra e cambio cu nos Pueblo ta desea.