Comision di Airlift di Aruba a convoca pa su prome reunion di aña diabierna 9 di mei ultimo na Aeropuerto di Aruba, treciendo hunto lidernan clave den turismo y di aviacion pa discuti prioridadnan strategico pa servicio aereo y crecemento di Aruba como destinacion.
Durante e prome reunion di e aña aki, a conta cu presencia di mr. Wendrick Cicilia, Minister di Turismo, Transporte y Labor. E tabata compaña pa su consehero Antoinette van den Berg. Di parti di e demas partnernan den turismo tabata presente Ronella Croes, CEO di Aruba Tourism Authority (ATA) y Sanju Luidens, CMO di Aruba Tourism Authority (ATA).
Pa aeropuerto, cu ta hunga un rol crucial den atrae y maneha e aerolineanan, tabata presente Barbara Brown, den su calidad di “Chief Revenue Development & Communications Officer” na Aruba Airport Authority (AAA) hunto cu Jo-Anne Arends, como “Aviation Business Development Executive” na Aruba Airport Authority (AAA).
Di parti di e Departamento di Aviacion Civil di Aruba a participa Albert Boekhoudt, como inspector di transporte aereo y Facilitacion hunto cu Charles Huntington, pa a duna e perspectiva di aviacion.
E reunion aki tambe a marca e “onboarding” oficial di Minister Wendrick Cicilia den e comision. Representando Aeropuerto di Aruba, Jo-Anne Arends a dirigi e presentacion den nomber di e presidente, resaltando e rendimento y strategia actual di airlift pa Aruba. Tambe a repasa e iniciativanan di servicio aereo continuo, incluyendo desaroyo di ruta nobo. Na final a elabora riba e pronostico y proyeccion pa e periodo venidero.
“E tabata un sesion productivo y un oportunidad valioso pa alinea cu e minister riba nos metanan comparti pa conectividad aereo di Aruba”, asina Jo-Anne Arends a bisa na final di e reunion.
Tocante e Comision di Airlift
E asina yama “Aruba Airlift Commitee” ta existi desde aña 2014 caba. E ta sirbi como un plataforma strategico pa dialogo y tumamento di decision riba desaroyo di servicio aereo, capasidad turistico y expancion di ruta. Desde aña 2017, e comision ta presidi pa Jo-Anne Arends di Aruba Airport Authority (AAA) y ta reuni periodicamente pa fomenta alineacion entre partnernan clave. E comision ta inclui representantenan di Ministerio di Turismo, Transporte y Labor; Aruba Tourism Authority (ATA); Aruba Hotel and Tourism Association (AHATA); Departamento di Aviacion Civil Aruba (DCAA) y Aruba Airport Authority (AAA).
E grupo ta reuni tur cuartal pa evalua e rendimento di airlift, atende retonan y coordina planificacion pa sostene e posicionamento di Aruba a largo plaso como un destinacion turistico.
