Minister Ursell Arends ta un di e ministernan mas critica den gabinete Wever-Croes. E ta encarga entre otro cu naturalesa, medio ambiente, Serlimar, SABA y tambe integridad.
Pero riba e medionan social, e ta haya critica di robes pa drechi. Si nos coy un ehempel: Bubaliplas.
Amsterdam Manor a gana su caso contra gobierno, debi cu e area completo, te banda di Paradise Beach Villas, e holo stinki di e planta di purificacion ta asina intenso, cu ta corta rosea. E ta un molester grandi p’e turistanan y tambe e trahadonan di e diferente hotelnan riba e strip eynan. Hasta e localnan cu ta pasa den vecindario pa bay nan trabao na hotel, ainda, a pesar di e caso den corte, gana pa e hotel ya menciona, ta holiendo malo. Es mas, mas malo cu nunca pasobra ta sinti cu no a haci nada pa remedia e situacion eynan.
Asina mes e minister ta hustifica cu su maneho ta bayendo den un bon direccion y cu ya nan ta na caminda pa privatisa RWZI (no solamente na Bubali, sino tambe e otro dosnan cu tin na Aruba), pa un compania cu supuestamente lo haci e compleho aki uno mas grandi y moderno y hasta lo bin cu un solucion mobil, cu lo atende cu mas awa sushi acerca.
Pero ex-minister Otmar Oduber, no ta pensa mesun cos. El a reacciona riba Minister Arends, bisando cu e resultado di loke ta trata medio ambiente, t’e resultado cu nos ta mira bao di e maneho di Minister Arends, unda cu a haya tur cos cla. Pero ta mira cu nada no ta wordo haci den medio ambiente.
Di su parti Minister Arends a indica cu e manehonan cu Oduber a laga atras, no tabata hole bon. Nan tabata hole malo. P’esey Otmar Oduber ta caminda e ta aworaki. E ta un politico irelevante n’e momentonan aki, Arends a enfatisa durante un conferencia di prensa. Un dia Arends lo top’e riba cualkier plataforma politico ora mester hiba debate y e ora ey e lo atende cu ne.
Pero pa awo, e ta considera Oduber como un politico irelevante.
“Warawara no ta gasta su tempo pa jaag musca,” ta loke el a indica.
ESPACIO PA MEHORACION
E minister a agrega durante di e reunion aki, cu e ta revisa y ta autocritica su mes. E ta percura pa analisa con su maneho y hunto cu su team ta analisa e manehonan constantemente. A bisa esaki durante conferencia di prensa cu tin espacio pa mehoracion. E ta convenci cu ta den bon proceso y riba e bon caminda. Pa 70 aña a dura pa yega n’e dump di Parkietenbos. Politico a bin y a bay y a priminti cu lo cera esaki, pero awo a logra esaki.
Tur cambio di custumber ta bin cu su resistencia. E ta convenci, cu como pais, ta den bon direccion. Mesun cos ta trata pa loke ta RWZI, politico a bin y a bay. Desde 1997 ya caba DOW a informa gobierno cu RWZI a surpasa su capacidad di carga. Na 2002 tabatin e prome caso den corte caba, caminda un hotel a hiba gobierno corte.
Esaki no ta algo di awo. E minister a agrega cu na 2018, e no tabata parlamentario ni gobernante. E t’esun cu a hiba e tema di RWZI como uno nacional. E t’esun cu a cuminsa cu e discusion di e tema aki. Ora cu a forma e gabinete actual, a palabra hunto cu e partner den coalicion y prome minister, cu pa loke maneho di desperdicio tanto likido y solido lo cay bao di ministerio di naturalesa. Desde Status Aparte sa caba cu mester bin cambio pa loke ta trata con ta atende RWZI (tin tres) y tin di bisa cu pa februari esaki lo privatisa.
Lo tin solucion a corto plaso, sino a largo plaso tambe con pa atende cu ne.
ENFOKE RIBA SOLUCION
Gobierno tin su enfoke riba solucion y riba esey ta keda enfoca pa trece solucion berdadero p’e comunidad di Aruba cu no tin ningun impacto pa nos economia.
Bubaliplas ta cay bao di Ministerio di Naturalesa, aunke e operacion ta supervisa pa DOW, pero e maneho di desperdicio likido y solido ta cay bao di ministerio di Arends.
A traha un comision pa loke ta e privatisacion di e RWZInan y e cadena di riolering. Ta bay tin inversion cuantioso cu lo tuma luga. Ley a bay Raad van Advies te bin bek y awo DWJZ ta trahando e nader rapport. Unabes cu e ta cla, e ley lo bay parlamento pa wordo trata y esey ta premira pa tuma luga na februari.
E minister a indica cu a inverti un tiki mas di 400 mil florin y hunto cu e otro instancianan den comunidad cu a compromete fondo, a inverti tanto den pomp, tanto den bio augmentation pa minimalisa e holo, conforme e veredicto di hues den e caso di Amsterdam Manor contra pais Aruba.
Cu esaki ta cumpliendo cu e veredicto, door di minimalisa e impacto cu tin tambe pa Land Aruba y e area aki.
Arends tabata hotelero prome cu el a bira gobernante. E ta reconoce e impacto cu esaki tin. Nos economia ta draai rond di turismo. Nos economia ta naturalesa y ta nos deber como gobernante pa atende cu esaki den un forma di urgencia. Esaki ta loke nos ta haciendo tambe.
Parlamentario Berlis a haci varios pregunta riba e caso di Amsterdam Manor, pero e Minister no a contesta y lo manda e contestanan por escrito n’e parlamentario. Aki ta caminda cu integridad ta hunga un rol, pasobra como minister di integridad, no mester tin e temor pa laga pueblo sa, kico su contestanan lo ta. Pasobra hopi biaha e contestanan aki no ta wordo divulga den comunidad. Den otro palabra, e Parlamentario por haya su contestanan, pero nunca pueblo lo haya sa di parti di e minister, si ta asina transparente e ta, kico lo ta su maneho pa loke ta e parti aki.
E CANTIDAD DI PREGUNTA
Minister Arends a indica durante e conferencia di prensa cu e ta e minister cu a haya mas pregunta, y cu a contesta mayoria di nan.
Si gobierno cumpli cu loke a compromete su mes pa loke ta trata e maneho y e inversionnan cu mester tuma luga den RZWI, no necesariamente gobierno mester paga e dwangsom di 10 mil pa dia, te cu un total di 250 mil florin.
Dia 30 di januari tin reunion cu e compania cu esun cu ta encarga pa traha e bio augmentation pa Aruba, p’asina haya un update di tur e trabaonan cu ta wordo haci y con efectivamente ta tumando luga. E solucion ta den porta. Februari mas tarda RWZI lo wordo privatisa pa un compania cu lo yama AWSS (Aruba Wastewater Sustainable Solution), tin ya caba compromiso financiero pa inverti den un RWZI completamente nobo, pero den short term lo inverti tambe den un mobile RWZI cu por procesa awa. E planta cu tin ta procesa 4500 cub di awa. E planta mobil lo procesa 4 mil adicional, di e manera aki ta acapara tur e awa cu yega y procesa esaki na un nivel cu ta riba standard internacional. Mientras tanto ta inverti pa desaroya un planta completamente nobo.
Awo ta di spera pa mira si e compania nobo aki AWSS lo por haci e trabao necesario pa soluciona e molester feroz cu tin di parti di e RWZI. Lo yega un alivio p’e holo stinki cu tin den e area aki? Esey ta algo cu nos mester sinta y wak.