Awe Gabinete Rutte IV a tene su ultimo Reunion di Conseho di Reino (RMR), mirando cu un Gobierno nobo di Hulanda ta den pleno formacion y e huramentacion door di Rey Willem Alexander di e Ministernan y Secretarionan di Estado ta poni pa tuma lugar 2 di juli benidero.
Despues di a gradici e Ministernan y Secretarionan di Estado pa e cooperacion cu nos pais, e Minister Thijsen a dirigi den un mensahe personal na Mark Rutte como presidente di RMR. Akinan e mandatario a bisa cu ela experencia Rutte di tempo cu e tabata lider di fraccion di VVD den Tweede Kamer, tambe durante e proceso di desmantelacion di Antia y despues cu ela bira Prome Minister.
Minister Thijsen: ‘Mi a experencia tur esaki cune y tabata tin e privilegio pa a traha cune e ultimo dos añanan como Minister Plenipotenciario. Den nomber di Gobierno y pueblo di Aruba mi a felicita y gradici y alabes desea su persona tur clase di exito den su funcion nobo como Secretario General di NATO. Cu ta un funcion cu hopi reto, mirando e circumstancianan den e mundo actual; cu e ta e persona cu nan a duna tur confiansa y sosten pa logra cu tur cos bai bon awor. Un trabao hopi pisa, pero nos tin confiansa den Mark Rutte.’
Minister Thijsen tambe tabata tin palabranan di gradicimento special pa Secretario di Estado Alexandra van Huffelen. ‘Mi a experencia hopi Secretario di Estado y hopi Minister di Asuntonan di Reino, pero Van Huffelen tabata e unico cu a bisa hopi cla y publicamente durante di e firmamento di e “Onderlinde Regeling Samenwerking en Hervormingen”, cu mester a bira un Onderlinge Regeling y no un Ley di Reino (Rijkswet), cu e tin confiansa total den e mandatarionan di e paisnan. Prensa Hulandes tabata critico riba esaki, pero Van Huffelen a keda riba su punto di bista,’ asina e mandatario a bisa.
Minister Thijsen a bolbe ripiti cu Aruba ta kere den un Reino fuerte, pero cu respet pa otro, duna otro sosten, duna nos loke ta parti di nos tambe. Sigur, segun sr. Thijsen, cu e aña aki ta celebra 70 aña di Statuut. ‘Unda cu mester constata cu nos no ta den 1954 mas, pero ta 2024. Nos ta madura y nos mester por tin mas participacion real den e desaroyo di Reino,’ tabata palabranan di Minister Plenipotenciario di Aruba Ady Thijsen.
Na final di e conferencia di prensa, periodista di Telearuba Ryan Oduber a haci entrega di un regalo na Secretario di Estado Alexandra van Huffelen como graditud y aprecio pa su cooperacion cu prensa Caribense.
