Na Universidad di Utrecht a tuma lugar un simposio den cuadro di 70 aña di Statuut di Reino Hulandes. E simposio a conta cu diferente oradornan, manera ex Staatsraad na Raad van State Milly Schwengle y prof Gerhard Hoogers, director di Gabinete di Gobernador di Sint. Maarten. Minister Plenipotenciario di Aruba mr. Ady Thijsen tabata tin e honor pa a habri e simposio cu un discurso.
Minister Thijsen den su discurso a repasa e historia di e Statuut cual a keda firma na 1954. Despues di e fecha tabata tin diferente momentonan cu adapcion pa medio di amendiana a wordo treci den e Statuut.
E mandatario a bisa den su discurso cu un regla basico di Statuut ta cu tin un nacionalidad pa tur habitante di Reino Hulandes, un hefe di estado, un maneho di asuntonan exterior y defensa comun. Cooperacion riba diferente tereno ta posibel, pero cada pais autonomo ta regula su mesun asuntonan interno. Mientrastanto segun sr. Thijsen a constata cu den Reino Hulandes ta existi un deficit democratico. Thijsen: ‘E deficit democratico den Reino a wordo defini door di Raad van State na 2001cu “ta falta un representacion democratico igual y completo di e poblacion di Reino Hulandes den decision riba nivel di Reino”. E falta di igualdad completo di e cuater paisnan den Reino basicamente ta contra e principio di igualdad (gelijkheidsbeginsel) cu ta ancra den e constitucion di hopi democracianan.
E POK (Parlementaire Consultatie Koninkrijksrelaties) na 2008 a pidi e Comision Deficit Democratico pa bin cu un relato riba e legitimidad di e proceso di tuma desicion den Reino. E comision aki na 2009 a bin cu nan raport “Kiezen voor het Koninkrijk”. Minister Thijsen: ‘Lamentablemente no tabata tin hopi atencion pa posibel deficiencia y solucionnan cu e comision a identifica, entre nan cu no tin un Parlamento di Reino y tambe e instalacion di un Corte Constitutional pa regla disputa (geschillenregeling) entre e paisnan.’
‘E posicion di Aruba bou di Statuut ta cla! Nos ta kere den un Reino fuerte unda nos por convivi, traha hunto, tuma decision hunto y carga hunto e responsabilidad pa medio di un bon realisacion di e medionan disponibel den cuadro di e “Onderlinge Regeling Samenwerkingshervormingen”. Tambe un Areglo di Disputa conforme articulo 12 di Statuut y e mocion Van Laar unda structuralmente ta haci uso di articulo 17 di Statuut, unda banda di e derecho di entrega mocion y amienda, e delegadonan special di Aruba, Curaçao y Sint Maarten ta haya derecho pa vota den e caso di tratamento di Leynan di Reino (Rijkswet). Esaki ta nifica cu lo mester adapta articulo 12A di Statuut. Ta haci 14 aña cu e amienda Wever/Thijsen cu 140 voto na fabor a keda aproba den Tweede Kamer al respeto di e Areglo di Disputa. Den e siguiente lunanan nos lo bin cu un proposicion pa un Ley di Reino (Rijkswet) encuanto un Areglo di Disputa segun articulo 15 lid 3 di Statuut,’ segun Minister Thijsen.
Finalmente e mandatario a bisa cu lo mester adapta articulo 36 di Statuut pa duna mas contenido na ayudo y sosten na otro y cu e Statuut ta keda di importancia pa tur pais den Reino y pesey e Statuut lo mester encera igualdad y husticia den Reino Hulandes.
